uMthunywa
Thokozile Mbedzi
KUBOTSHWE indoda eyodwa esiqintini seMusuvugwa koChivi, amabili abaleka kulandela ukutshontsha imota eHarare ngempelaviki.
Kuzwakale ukuthi uTinashe Chosayina oleminyaka engu-22 ohlala eBudiriro eHarare labanye bakhe ababili bahlaselwe ngamapholisa isiwiji sawa emlonyeni nanko phela bathe ngemva kokutshontsha imota kanti kababuzanga elangeni ngoba ibile-tracker encedise amapholisa ukuthi balonde indlela yamasela la aze atholakala.
Isikhulumi samapholisa eMasvingo uInspector Kudakwashe Dhewa uthe amapholisa abophe indoda ebihamba labanye bayo ababili kulandela ukutshontsha imota eHarare.
uInspector Kudakwashe Dhewa
“Amapholisa ohlangothi lweCID kanye lamanye amukele umbiko wemota etshontshiweyo usuka kwesinye isikhulu samapholisa bahle baqala ukuthungatha umkhondo wawo.
“Oguluva laba kubikwa sebetshontshe imota babhekisa amabombo eMasvingo ngenhlanhla umamangala wachaza ukuthi imota yakhe ile-tracker kungakho kukhanya iya eMasvingo amapholisa ahle agcwala emgwaqweni wokungena kulelidolobho kunye laphakathi kodwa abetheswacala bezwa udletshana lolu bahle batshibilika bangena umgwaqo weMasvingo-Mbalabala beqonda koChivi,” kuchasisa uInsp Dhewa.
Uqhubekele phambili esithi ekuhlolisiseni kwabo i-tracker bananzelela ukuthi imota le ime emzini kaMsuvhugwa ngaphansi kwenduna uMadlangovhe.
Abacuphi laba bahle bayavimba kule indlu kodwa ababili benelisa ukubaleka lo omunye wadutshulwa enyaweni kunye ledolweni okwenza wahle wabotshwa.
Imota le ebitshontshiwe ibiza iUS$2 900 kodwa umakhalekhukhiwni kunye leUS$18 eyayisemoteni akuzange kutholakale.
“UTinashe wahle wathwalelwa eHarare lapho okudalwe khona icala leli.
“Sithanda ukubonga uzulu ngokusebenzisa i-vehicle tracking application yona encedise amapholisa ukuthi balandele umkhondo wemota etshontshiweyo baze bayithola.
“Sikhuthaza abanye njalo abalezimota ukuthi bafakise ama-tracker ukuze kubelula ukulandela umkhondo wemota zabo nxa sezithe zatshontshwa,” kuphetha uInsp Dhewa.
