uMthunywa
Musa Janga
Kulandela ukuphuza ukuna kwezulu abalimi sebekhuthazwe ukuthi balime izilimo ezincane okuyizo ezilakho ukumelana lokoma.
Ekhuluma lomlimi wesabelweleni seMatabeleland South eGwanda uMnumzana Abdul Nyathi ubike ukuthi emva kwalezindaba kungcono ukuthi abalimi balime izilimo ezingadingi izulu elinengi.
“Njengoba likhanya lisalela phezulu izulu ukuze senelise ukuphila abalimi kabalime izilimo ezingadingi amanzi amanengi njalo eziphangisa ukuvuthwa njengendumba, uphoko kanye lamabele.
“Kumele ukuthi inyanga kaLwezi ifika izulu libe seliqalisile ukuna kodwa ungananzelela loMpalakazi usefikile kodwa akuthembisi lutho, abantu sebengathwala nzima ngokudla,” kuchaza uMnu Nyathi.
Uqhubeke esithi izilimo ezinjengendumba ziyaphangisa ukuvuthwa ukwedlula umumbu njalo ziyamelana lokoma.
“Umumbu ungaswela izulu uhle uphelele khonapha kodwa indumba, uphoko kanye lamabele kuyakhula kunjalo emhlabathini ongelamanzi ngakho yizo ezilimo ezingasiza abantu endlaleni,” kulandisa uMnu Nyathi.
Uphethe ngokuthi bona njengabalimi balokudana ngezulu leli ngoba lingekela ukuna sokubulele umsebenzi wabo.
“Umsebenzi wethu njengabalimi weyeme kulo izulu kungakho lingaqhubeka lingani umsebenzi wethu uzakuba nzima kakhulu,” kuphetha uMnu Nyathi.
