uMthunywa
Khanyile Ndebele
INHLANGANISO ebona ngezokulima eyeAgritex ngaphansi kogatsha olubona ngezoMhlabathi, Ezokulima,
Ezokufuywa kwenhlanzi, Amanzi kanye Lokuhlaliswa kutsha emaphandleni, isixwayise abalimi ukuthi balime imbhida eyehlukeneyo ngoba ilomkambo omkhulu kunye lenzuzo enhle.
UNkosazana Treggy Mpofu ongumlimisi koBulawayo uthe abalimi abanengi abaphatheka ekulimeni imbhida sebesenelisa ukugcina izimuli zabo, lokubhadala imali zabantwana zesikolo kunye lokutshayelana izimali.
UNkszn Mpofu uthe umlimi angahlanyela imbhida ngendlela eqondileyo ulakho ukuzenzela imali enhle.
“Okwakuqala umlimi kumele akhethe abe selungisa umhlabathi walapho asekhethe ukuhlanyela khona izilimo zakhe.
“Okwesibili yikuvula imizila ulungisa lapho okuzangena khona inhlanyelo. Lapha uyabe ugebha amagodi atshona okuyi-15cm njalo abe makhulu okungaba yi-15cm.
“Okulandelayo yikudinga i500 grams yomquba yokufaka phakathi kwegodi linye ngalinye lapha ofaka khona inhlanyelo yakho ubusugqibela inhlabathi,” kuchasisa uNkszn Mpofu.
Uthe nxa umlimi engelayo inhlanyelo ulakho ukuthi ahlanyele amaxhakela.
“Kumele ufake ixhakela elilodwa egodini linye ngalinye, ubusufaka umquba wokuvundisa umhlabathi.
Okokucina yikuthelela, usebenzisa amanzi ezulu kumbe amanye nje amanzi olawo.
Uphinde waxwayisa abalimi ukuthi balimuke bangaze bathelela kakhulu imbhida yabo ukuze bavikele ukubola.
“Nxa umlimi elima imbhida yakhe angayihlanganisa lehanyanisi, marigold loba i-milkweed ukuze avikele izibungu esivandeni sakhe.
“Ngaphandle kokusebenzisa izilimo lezi, umlimi angathenga njalo imithi ezitolo ezithengisa inhlanyelo lemithi yezilimo lezifuyo ukuze axotshe izibungu ezihluphayo esivandeni sakhe,” kuphetha uNkszn Mpofu.
