Limani idelele liyavuma loba kutshisa

12 Nov, 2020 - 00:11 0 Views
Limani idelele liyavuma loba kutshisa Idelele lentanga

uMthunywa

Joel Ndlovu
ABALIMI sebekhuthazwe ukuba balime idelele ngoba yisilimo esilula ukulima lokunakekela njalo siyavuma loba umkhathi utshisa.

Ekhuluma lentatheli kaMthunywa uNkosikazi Ntombizethu Ndlovu oyingcitshi kwezokulima lokufuya esabelweni seMatabeleland North uthe abalimi kabalime idelele ngoba lilomkambo omkhulu njalo lilimeka kuhle ngesikhathi sokutshisa.

“Abalimi ngibakhuthaza ukuthi balime idelele ngoba khathesi kuyatshisa kodwa lona kalilandaba lawo umkhathi lo ngoba liyalimeka lanxa kutshisa.

“Idelele yisilimo esivuma emkhathini okhudumalayo njalo esingadingi amanzi amanengi ngakho inyanga kaNcwabakazi kusiya phambili kwandise ukuba lelanga elihambisana lokukhula kwesilimo lesi,” kulandisa uNkkz Ndlovu.

Uqhubeke wathi idelele yisilimo esikhulayo laloba amanzi emalutshwane.

“Idelele alihluphi ukulima ngoba aliwadingi amanzi amanengi kakhulu, umlimi ulakho ukuthelela ngemva kwensuku eziyisikhombisa kusiya kwezilitshumi, idelele lifuna ukulinywa emhlabathini ovundileyo kukanti nxa ungavundanga umlimi angafaka umvundiso esivandeni kumbe ensimini yakhe.

“Idelele yisilimo esilendleko eziphansi kubalimi ngoba asivamanga ukukhathazwa yizibungu okwenza umlimi angalahlekelwa yimali enengi,” kuchaza uNkkz Ndlovu.

“Idelele lilakho ukulethela abalimi inzuzo ephezulu bengasilima ngokusithengisela umphakathi njalo sesiyingxenye yezilimo esesithengiseka laphandle kwelizwe,” kutsho uNkkz Ndlovu.

Uphethe ngokuxwayisa abalimi ukuthi bahlolisise ukuba indawo lapho abahlanyela khona zihlanzekile na.

“Abalimi kumele bahlolisise ukuthi isilimo sisendaweni ehlanzekileyo engela khula kanye lezinye izihlahla ezingaphambanisa ukukhula kwesilimo lesi ngakho kumele abalimi bahlale behlola kanye lokususa ukhula phakathi kwezilimo,” kuphetha uNkkz Ndlovu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds