uMthunywa
Bongani Ndlovu
NGOKUSONDELA kwesikhathi sokutshisa abalimi sebekhuthazwe ukuthi baqale amalungiselelo okulima isilimo sedelele ngoba kuyisilimo esivuma emkhathini otshisayo.
Ekhuluma lephephandaba likazulu umlimi uMnumzana Malcom Phiri ongumlimi esabelweni seMatabeleland South uthe abalimi kabalungiselele ukulima idelele ngoba lilomkambo omkhulu njalo lilimeka ngesikhathi sokutshisa.
“Abalimi sibakhuthaza ukuthi baqale amalungiselelo okulima idelele ngoba isikhathi sokutshisa sesisondele.
Idelele yisilimo esivuma emkhathini okhudumalayo njalo esingadingi amanzi amanengi ngakho inyanga kaNcwabakazi kusiya phambili kwandise ukuba lelanga elihambisana lokukhula kwesilimo lesi,” kulandisa uMnu Phiri.
Uqhubeke wathi idelele yisilimo esikhulayo laloba amanzi emalutshwane.
“Idelele alihluphi ukulima ngoba aliwadingi amanzi amanengi kakhulu, umlimi ulakho ukuthelela ngemva kwensuku eziyisikhombisa kusiya kwezilitshumi, idelele lifuna ukulinywa emhlabathini ovundileyo kukanti nxa ungavundanga umlimi angafaka umvundiso esivandeni kumbe ensimini yakhe,” kuchaza uMnu Phiri.
UMnu Phiri uthe ubuhle bokulima idelele yikuthi alihlaselwa yizibungu ezinengi.
“Idelele yisilimo esilendleko eziphansi kubalimi ngoba asivamanga ukukhathazwa yizibungu okwenza umlimi angalahlekelwa yimali enengi.
Kukanti silakho ukubalethela inzuzo ephezulu ngokusithengisela umphakathi njalo sesiyingxenye yezilimo esesithengiseka laphandle kwelizwe.
“Idelele liyisilimo esingahluphiyo ukulima ngakho abalimi kanye lozulu bakhuthazwa ukuba balime izilimo ezifana ledelele ezingakhula emhlabathini loba ngaphansi komumo womkhathi ongekho muhle,” kuchaza uMnu Phiri.
Uphethe ngokuxwayisa abalimi ukuthi bahlolisise ukuba indawo lapho abahlanyela khona zihlanzekile na.
“Abalimi kumele bahlolisise ukuthi isilimo sisendaweni ehlanzekileyo engela khula kanye lezinye izihlahla ezingaphambanisa ukukhula kwesilimo lesi ngakho kumele abalimi bahlale behlola kanye lokususa okuyizihlahla okukhulayo phakathi kwezilimo,” kuphetha uMnu Phiri.
