uMthunywa
Joel Ndlovu
ABALIMI sebekhuthazwe ukuba balime i-spinach ngoba silula ukulima lokunakekela njalo siyisitshebo esimnandi.
Ekhuluma lentatheli kaMthunywa uNkosikazi Agnes Ndebele uthe i-spinach silula ukulima njalo kumele abalimi bakhuthalele ukusilima.
“Umlimi kumele aqale adinge umhlabathi ovundileyo lapho azahlanyela khona isilimo sakhe ewuphendule ukuze izibungu eziphakathi kwenhlabathi zife.
“Ukuphendula umhlabathi kwenza wakheke kuhle njalo kuvumele ukuthi ukudla okusemoyeni kungene enhlabathini ukuze nxa sokuhlanyelwa isilimo sithole kulokudla enhlabathini,” kulandisa uNkkz Ndebele.
UNkkz Ndebele uqhubekele phambili esithi i-spinach kumele nxa sesihlanyelwa umlimi agebhe amagodi awehlukanise ngemamitha amahlanu.
“Kumele umlimi ehlukanise amagodi ngamamitha amahlanu emzileni, lokhu kwenzelwa ukuthi isilimo lesi singaminyani sikhule kuhle singaphambaniswa,” kuchaza uNkkz Ndebele.
“Umlimi akumelanga athelele kakhulu intanga ze-spinach nxa engahlanyela ngoba zingahlala zimanzi ziyabola njalo kuba lula ukuthi zihlaselwe yimikhuhlane, umlimi kumele abone ukuthi uthelela ngonanzelelo.”
“Kulemithi ehleliweyo umlimi okumele ayifafaze ukwenzela ukuthi alwe lemikhuhlane lezibungu ezingabulala isilimo, umlimi acine ethola inzuzo akade engayikhangelelanga,” kutsho UNkkz Ndebele.
Uphethe ngokuthi i-spinach siyasiza emzimbeni womuntu ngoba siyangezelela igazi ngakho-ke abantu bayakhuthazwa ukuba badle i-spinach kabili kumbe kathathu ngeviki. Ngaphandle kwalokho i-spinach yisitshebo esimnandi okuveza sobala ukuba abalimi kumele basilime ukuze abantu bathole okokutshebisa.
