uMthunywa
Wayne Ncube
INKAMPANI yeFarm and City Centre isikhuthaze abalimi ukuthi balime i-spinach ngoba kulula ukusilima njalo silomkambo omuhle.
Ekhuluma lentatheli kaMthunywa uMnumzana Ray Shava wenhlanganiso le ubike ukuthi abalimi kabangathathi kancane ukulima imibhida ye-spinach ngoba ilenzuzo enhle emkambo njalo ingalinywa loba ngasiphi isikhathi.
“I-spinach siyalimeka iloba yisiphi isikhathi ngakho abalimi bengasinakekela kuhle siyaphangisa ukukhula. Eminye imibhida ivuma ngezigaba zomnyaka ezithile kodwa i-spinach sona kasikhethi ngakho kwenza umhlobo lo wombhida ube lomkambo omuhle,” kuchaza uMnu Shava.
Ukuze imibhida le ikhule kuhle abalimi bayaxwayiswa ukuthi balime emhlabathini ovundileyo lapho abatshintshanisa khona izilimo njalo abalimi kumele bakhethe indawo lapho abangakaze balime khona imibhida le ukuze bayivikele emikhuhlaneni eyejwayekileyo ehlasela impande zayo.
“Abalimi balakho ukuthola isivuno esihle, okuqakathekileyo nje yikuthi babone ukuba izivande zabo zihlala zimanzi, kungakho bengavele bahlanyele i-spinach sabo kumele bahlale bethelela izikhathi zonke, ukuze sikhule kuhle,” kulandisa uMnu Shava.
Isivuno lesi singaphambaniseka lapho nxa umlimi engasivikelanga kuzibungwana eziyizo ezijwayele ukuhlasela impande.
“Izibungwana ezihlasela impande ziyaphambanisa ukukhula kombhida kwawo kungakho abalimi kabavikele lokhu ngokufafaza ngemithi,” kutsho uMnu Shava.
Uphethe ngokuthi i-spinach siyaphathisa kumpilakahle yabantu kungakho kwenza sibe lomkambo omkhulu.
“Umkambo we-spinach mkhulu ngoba inengi labantu sebelolwazi lokuthi siyaphathisa kumpilakahle kungakho-ke sebebanengi abasithengayo,” kuphetha uMnu Shava.
