uMthunywa
Blessing Moyo
ABALIMI bemadolobheni sebekhuthazwe ukulima i-garlic ezivandeni zabo okuyisilimo abalakho ukuzenzela imali ngaso ngoba abanengi besisebenzisa ekuphekeni.
Ekhuluma loMthunywa uNkosazana Treggy Mpofu onguHorticulture Specialist kunhlanganiso ye-Agritex koBulawayo uthe njengehanyanyisi, i-garlic ifuna umkhathi oqandelelayo ikakhulu nxa isilimo lesi siqala ukukhula.
“I-garlic ifuna umumo womkhathi oqandelelayo, kuthi nxa sesikhulile sesisiba labantwana siyabe sesifuna isikhudumezi. Isilimo lesi umlimi engasilima kunyanga kaMabasa kusiya kuNhlangula. Siyabe sifuna isikhudumezi esingaba yi-12 kusiya ku-24C.
“Isilimo lesi asifuni amanzi amanengi kakhulu ngoba amanzi amanengi acina esiphambanisa singasabi lamajodo amahle.
Agritex
“Nxa sisanda kuhlanyelwa kumele umlimi asithelele kakhulu ngoba kulapho esidinga amanzi amanengi khona.
“Isilimo lesi sidinga umhlabathi ophakathi laphakathi, angasosidaka njalo ongasotshebetshebe ukuze senze amajodo nxa esebunjwa. Umhlabathi kumele ubelomvundiso.
Umlimi uyabe ekhangelelwe ukuthi afake ifethalayiza lapho azalima khona engakahlanyeli abesephendula abesehlanyela i-garlic yakhe,” kulandisa uNkszn Mpofu.
“I-garlic ithatha inyanga ezine kusiya kweziyisithupha ukuthi ivuthwe kusukisela ihlanyelwa nxa isivuthiwe umlimi ubona ngokutsha kwamahlamvu abe lithanga kunye lokuswaba kwawo.
I-garlic isetshenziswa kakhulu yilabo abaphekayo njalo emzimbeni kubikwa iyahlanza igazi.
Uphethe ngokuthi umlimi nxa esevuna kumele agebhe amajodo ngonanzelelo angawageci.Nxa esevunile kumele ayichaye okwamalanga ayisitshiya galombili kusiya kutshumi ize yome amahlamvu phezulu.
