uMthunywa
Musa Janga
ABALIMI endaweni ezehlukeneyo sebekhuthazwe ukuthi balime ama-cucumber ngoba kasihluphi ngitsho ukulima.
UMthunywa uxhumane loNkosazana Bayethe Sibanda ongumlimi olandise ngokulimeka kwaso. Ubike ukuthi i-cucumber yisilimo esidinga amanzi, isikhudumezi kanye lomhlabathi ovundileyo ukuthi senze kuhle.
“Kumele umlimi enze isiqiniseko sokuthi lapho ehlanyela ama-cucumber uwahlanyela lapho athola khona ilanga njalo kumele umhlabathi wakhona ube ngomanzi, ovundileyo,” kuchaza uNkszn Sibanda.
Ubuye wathi isilimo lesi sidinga indawo enkulu yokuwahlanyela.
“Ulakho ukuthi nxa uhlanyela ama-cucumber uqale ufake inhlanyelo emagabheni athi angamila uwakhuphe uhlanyele endaweni enkulu ngoba ayisilimo esinabayo ngakho ayabe efuna indawo enkulu ukuze anabe aphinde athele kuhle.
Ubike ukuthi ama-cucumber yisilimo esingadingi ukukhangelwa kakhulu nxa singavele sihlanyelwe.
“Ama-cucumber awadingi kukhangelwa kakhulu njengezinye izilimo, engavele ahlanyelwe emhlabathini ofaneleyo athole konke okungawenza akhule ayazikhulela nje kuhle,” kuchaza uNkszn Sibanda.
“Ama-cucumber avame ukuhlaselwa yizibungu ezifana lama-cucumber bettles lama-spidermites. Lezi izibungu ziyalimaza ama-cucumber ziphinde ziwathelele umkhuhlane. Ngakho umlimi kuyabe kumele adinge umuthi wokuvikela lezizibungu ukuze athole isivuno esihle,” kulandisa uNkszn Sibanda.
Uphethe ngokuthi ama-cucumber alemihlobo etshiyeneyo kodwa wonke alinywa ngendlela efananayo.
“Kulemihlobo eyehlukeneyo yama-cucumber kodwa alimeka okufanayo njalo wonke awahluphi ukulima,” kuphetha uNkszn Sibanda.