uMthunywa
Wayne Ncube
ABALIMI sebekhuthazwe ukuthi balime amatamatisi ngoba alenzuzo emangalisayo nxa umlimi engawalima ngendlela eqondileyo njalo ngesikhathi esiyiso.
Ekhuluma loMthunywa uMnumzana Raphael Ncube oyingcitshi kwezokulima kunkampani yeFarm and City Centre uthe isilimo lesi siyadlisa kakhulu kodwa abalimi abakunanzeleli lokhu.
“Amatamatisi alemali okuzwayo, inengi labalimi licabanga ukuthi isilimo lesi kasilanzuzo ngoba abalalwazi ngaso, abanye balima emhlabathini ongahambelani laso yikho sisala, abanye njalo balima ngesikhathi esingayisiso.
“Lapha elizweni lakithi isilimo lesi singaqala ukulinywa ngenyanga kaMbimbitho, lokhu ngikutsho ngoba amatamatisi kafuni ukutshisa kakhulu njalo awafuni mqando kakhulu, afuna umkhathi okhudumalayo,” kutsho uMnu Ncube.
Uqhubekele phambili wathi okuqakathekileyo yikuthi umlimi abe lomkambo wakhe lapho athengisela khona isivuno sakhe.
“Ukulima amatamatisi njengoba ngisitsho kulenzuzo enengi sibili ikakhulu nxa umlimi evele elomkambo wakhe lapho athi angavuna ahle athengisele khona.
“Isilimo lesi inengi labantu liyasithanda kakhulu ngoba akulamuzi ongakhetha ukudla okungelamatamatisi nxa imali ikhona njalo yinto ethengwa nsuku zonke,” kulandisa uMnu Ncube.
Ephetha uthe uthanda ukukhuthaza wonke umlimi ukuba angahlaleli izandla ngoba ukulima amatamatisi akuhluphi ngitsho.
“Ngikhuthaza omama ikakhulu labo abahlala emaphandleni ukuthi bazivulele amathuba okwenza imali bazilimele isithelo lesi bangahlali phezu kwezandla. Balakho ukuziphilisa lezimuli zabo ngokulima amatamatisi.
“Ukulima amatamatisi akudingi okunengi, kufuneka nje inhlanyelo loba usaba lwamatamatisi, isivande esivundileyo lamanzi,” kuphetha uMnu Ncube.
