uMthunywa
YiNtatheli kaMthunywa
UHULUMENDE useveze ukuthi ababalisi sebezathola isabelo sengozi (i-risk allowance) se-10 phesenti njalo zonke izisebenzi zakhe zizangezelelwa iholo nge-40 phesenti okutsho ukuthi isisebenzi esizahola imali encane sesizathola i$14 500.
IKhabhinethi ifuqe isiphakamiso somholo wezisebenzi zikaHulumende ngoLwesibili okuveza ukuzimisela ukuthi aholise izisebenzi zakhe iholo elilesizotha.
Izisebenzi zizaqala ukuthola iholo elikhutshuliweyo ekupheleni kwayonale inyanga.
Ukuhola imali encane sokubangele ukuthi abanye ababalisi bathi kabenelisi ukuya emsebenzini okwenza bekela ukuya ezikolo kusukela ngenyanga kaMpandula kuvulwa izikolo.
Ekhuluma lentatheli ngemva komhlangano weKhabhinethi ngoLwesibili, uMphathintambo obona ngezokukhitshwa kwembiko uMonica Mutsvangwa uthe kusukela ngenyanga kaZibandlela uHulumende usengezelele iholo lababalisi ngesilinganiso esedlula i-1000 phesenti njalo ulokhe ezimisele ukwenza ngcono inhlalakahle yabo.
“Ngokuqaphela izibopho zakhe zokuholisa izisebenzi iholo elihloniphekayo, uHulumende usekhweze iholo lezisebenzi nge-40 phesenti njalo labo abazayithola basukela kubaqondisi kusiyaphansi. Phezulu kokwengezwa kweholo, ababalisi bazathola njalo i-10 phesenti ye-risk allowance,” kutsho uMphathintambo uMutsvangwa.
“I-basic salary entsha yombalisi isizakuba yi$18 237, engaphezulu kwePoverty Datum Line (PDL). Lokhu kutsho ukuthi kusukela ekuqaleni komnyaka iholo lababalisi selikhwezwe nge 1 284 phesenti. Isisebenzi sikaHulumende esiphansi sesizathola i$14 528. Lokhu kuqala mhlaka 1 Lwezi 2020.”
Uthe sekuyisikhathi sokuba ababalisi baqalise umsebenzi njalo uHulumende uzaqhubekela phambili ekhulumisana lenhlanganiso zababalisi ukuze athuthukise ukukhathazeka kwabo.
Uphethe ngokuthi lanxa uHulumende enika abafundi impahla yokuvikela ubhubhane lweCovid-19 (Personal Protective Equipment), abazali kanye labakhangela abantwana kumele bathengele abantwababo izayeke.
