Ethel Ncube
LIBAFIKELE ilanga eliyisithutha abafana abayizelamani akade sebehluphile ngokubamba abantu inkunzi eMbembesi nanko phela bacine bebamba uyise obazalayo bengananzeleli.
Kucatshangelwa ukuba abafana abazalwa ngumabhalane wenduna uMnumzana Thembile Dywili babecathamile bathi bebona umuntu efika bamgongoda befuna ukumtshontshela bathe bethi mehlo suka bazwakala sebehlaba umkhosi nanko basebenanzelele ukuthi sebehlasele uyise.
Kubikwa abafana laba, okungasatholakalanga amagama abo, bahlasele uyise kumaviki ambalwa asanda kwedlula.
Esinye isakhamuzi uMnumzana Elikana Sibanda uthe izigangi sezihluphile esigabeni osekusenza besabe lokuhamba ilanga lingavele litshone.
“Abafana laba bavele sebehlupha esigabeni bayagamula abadlali. Ilanga lingatshona nje ungekho ngekhaya uhle utshaywe luvalo ukuthi uzafika uphephile ngekhaya.
“UDywili lo wayevela ezitolo ilanga selitshonile wahlangana labafana laba bamgongoda wawela phansi bathe bethi bamhlasele ngamabhemba babona kunguyise.
“Lalamuhla lokhu balesithuli ngesenzo sabo ngoba baphosa babulala uyise ngenxa yokungaziphathi,” kulandisa uMnu Sibanda.
Kubikwa uyise wabafana laba wahamba wayabika emapholiseni.
Ekhuluma loMthunywa umabhalabe wenduna uMnu Dywili wale wemba phansi ukuthi kulesehlakalo esinjalo esenzakalayo.
“Lokho okukhulunywa ngabantu ngamanga kangizange ngitshaywe mina,” kutsho uMnu Dywili andubana aqume ucingo.
UMthunywa uxhumane lenduna yakule indawo uDumisani Ndondo oveze ukuba kuliqiniso ukuba umabhalane wakhe wahlaselwa yizigangi ebusuku.
“Kuliqiniso ukuba watshaywa njalo abafana abamtshayayo basemapholiseni abakahanjiswa emthethwandaba,” kubika induna uNdondo.