uMthunywa
Nkosilathi Sibanda
UMDLALO wokugijima usuphakamise impilo zabantu abanengi kuleli, okuyikho okumele kukhuthaze bonke abalethalenta lalumdlalo ukuthi baze ngobunengi babo emncintiswaneni weLiquor Hub 10km Fun Run Charity Race, kubika umsekeli kamphathintambo we-Industry and Commerce kuHulumende, uRaj Modi.
Umjaho lo, osekelwa nguModi ngeR50 000, uzaqhutshwa ngeSonto ekuseni enzikini yedolobho lakoBulawayo. Inhlanganiso yeBulawayo Athletics Board (Bab) yiyo ephethe intambo zokuqoqa umncintiswano. Kubikwa umjaho uzaqala, uphinde uphele eLiquor Hub emgwaqweni kaFife Street phakathi kuka-4th lo-5th Avenue.
Ekhuluma lentatheli kaMthunywa, uModi wazise ukuba umdlalo wokugijima uhlezi usenhliziyweni yakhe ngakho uzawusekela mihla yonke.
Uthe akufunayo yikuthi aphakamise abagijimi, ikakhulu ulutsha, ukuze bafunde ukuba umdlalo lo ulamandla okuguqula impilo.
Umjaho lo, osekelwa nguModi ngeR50 000, uzaqhutshwa ngeSonto ekuseni enzikini yedolobho lakoBulawayo.
“Usuphendukile umjaho wethu we Liquor Hub 10km Fun. Kuyangijabulisa lokhu,” kutsho uModi.
“Umdlalo wokugijima ngiwuthanda kakhulu, yikho okungenza ngibe lentshukuntshu yokuthi ngiwuxhase.”
Inkokheli le, ephinda ibengusomabhizimusi ohlonitshwayo koBulawayo uthe kuyisifiso sakhe ukuthi kuminyaka ezayo, umjaho weLiquor Hub ukhule, wenelise ukunxusa lentshantshu zokugijima ezivela kwamanye amazwe.
“Kumele nxa kuyiwaphambili, sibone ukuthi sisebenze nzima ukuze senze lumncintiswano ubemkhulu. Kungaba kuhle nxa sesinxusa abanye abakwanye amazwe. Yikho esizakuhlosa lokhu.”
Lakanye inhloso kaModi labanye bakhe isihuge inengi labagijimi bakuleli asebegijime kwezinye inkundla ezinkulu emhlubulweni ongezansi yezwekazi le-Africa. Kubagijimi laba kuloMoses Tarakinyu, Jonathan Chinyoka, Trust Chidomaya, Isaac Mpofu, Kelvin Pangiso loNkosiyazi Sibanda.
Umgcinisihlalo weBab uWatson Madawanyika utshele iphephandaba likazulu ukuthi ukubhalisa ukugijima kusavuliwe.
“Lo ozizwa efuna ukuncintisa kumjaho kuzwa uzabhadala iUS$5 kumbe i$4 000 eyakuleli. Ukubhalisa kusesitolo seLiqour Hub Wholesale,” kubika uMadawanyika.
“Asebekhulile labasakhulayo labo banxusiwe. Sikhalela kakhulu ulutsha ngoba yikho lapho okulekusasa yelizwe kwezomdlalo wokugijima.
Bulawayo Athletics Board
Umjaho weLiquor Hub lo uqoqwe ngemva kweviki kuqoqwe njalo omunye umncintiswano oweHope Fountain Marathon.
Kukhangelelwe ukuthi ngomnyaka ozayo kuqoqwe imincintiswano eminengi koBulawayo nanko kulindwe ukuphenduka kweNkulumane Old Mutual Race lowePPC Matopos Ultra Marathon ngoMabasa.
