uMthunywa
YiNtatheli kaMthunywa
NJENGOBA isigaba sokuthengiswa kwegwayi sesisondele abalimi abahambisa izilimo zabo emkambo baxwayiswa ukuthi balandele yonke imithetho yeCovid-19 ehlose ukwehlisa ukumemetheka kwegcikwane leli.
UMqondisi weZimbabwe Farmers Union uMnumzana Paul Zakariya ngoLwesihlanu ukhuthaze abalimi ukuthi bahlale begqoke izaheke, batshiyelane imikhandlo njalo balandele yonke imithetho yokuhlanzeka ukuze baqinisekise ukuthi benza ibhizimusi yabo endaweni ephephileyo.
UMnu Zakariya ukhumbuze abalimi ukuthi kungumlandu womuntu wonke ukuba abantu bonke abaphatheka ekuthengisweni kwegwayi kulesisisaba ngenhlangothi zabo ezehlukeneyo bavikelekile ukuze bengahlaselwa ngumkhuhlane lo.
Nyakenye uHulumende wachaza ukuthi ezokulima zingumsebenzi obalulekileyo, kungakho abaphatheka emsebenzini lo banikwa imvumo yokuqhubeka ngemisebenzi yabo ngaphansi kwemithetho eqinileyo yokuvikela ukumemetheka kwegcikwane leli eselibulele abantu abanengi emhlabeni jikelele njalo kwaphambanisa amabhizimusi.
ITobacco Industry and Marketing Board (TIMB) kanye lezinye inhlanganiso ezithintekayo beziphathekile ngokulungisa izindlela zokuqinisekisa ukuphepha kwabathintekayo ekuthengisweni kwegwayi kugcikwane leli.
Emkambo kuzabe kusamukelwa igwayi eliyabe libhaliswe ngaphambili kokuthengiswa, okuyindlela yokwehlisa isikhathi esizachithwa ngabalimi kuleyondawo andubana baqede ukuthengisa basuke.
