Kwehlule ukuthi ayekuKaizer Chiefs uKnox

18 Feb, 2021 - 00:02 0 Views
Kwehlule ukuthi ayekuKaizer Chiefs uKnox UKnox Mutizwa

uMthunywa

UMDLALI weLamontville Golden Arrows uKnox Mutizwa kasoze adlalele iKaizer Chiefs nanko lize lavalwa iwindi lokuthengiswa kwabadlali kuligi yeDSTV elokhe ehleli eThekwini.

UMutizwa ufunwa yiKaizer Chiefs ngamehlo abomvu njalo bekubikwa ukuba leliqembu beliseduzane lokumthenga, kodwa akwaziwa ukuthi yini eliphazamise ukuthi limnikeze ijesi.

Imbiko ephuma kuGolden Arrows iveza ukuthi umqeqetshi wayo uMandla Ncikazi wembe phansi wathi kungangcono uMutizwa aphiwe imali endaweni yokuthi aqonde eNaturena.

UNcikazi useveze ukuthi uzadanela kubadlali bakhe abenza kuhle ababalisa uKnox Mutizwa nxa ezacabanga ukuqeda isizini ebalwa lamaqembu aku-Top 8.

Umqeqetshi lo kubikwa ngemva kokukhangela abadlali bakhe, ukubone kufanele ukuthi akhulume obala ngekusasa likaMutizwa.

Selokhu eqeqetshe kuBafana Bes’thende, uNcikazi iqembu uselenze latshintsha kakhulu. Loba lingayinqobi imidlalo ngendlela afuna ngayo, uyasuthiseka.

Kusenjalo, iKaizer Chiefs ifuna ukuthi kudingwe elinye ilanga lapho ezadibana khona le-Wydad Casablanca yaseMorocco kumdlalo we-Caf Champions League.

Amaqembu womabili bekumele adlale ngempelaviki.

Amakhosi avinjelwe ukungena eMorocco ngenxa yokumemetheka kobhubhane lweCovid-19 eMzansi.

NgoMvulo iWydad ithe umdlalo lo udlalelwe komakhelwane bayo, i-Egypt abavumileyo ukuwuphatha eCairo phakathi kukaNhlolonja 15 lo-20. ICaf ibikade inike iWydad amahola angu-24 ukunquma ukuthi izawudlala nini lumdlalo wokuvula amaqoqo kaGroup C.

Izolo, iChiefs ikhiphe umbiko ichasisa ngesinqumo sayo emva kokuthola incwadi evela kuCaf. “Incwadi ethunyelweyo ithi umdlalo ophakathi kwala maqembu womabili kufanele udlalwe ngoLwesihlanu 19 kuNhlolanja, e-Al Salam Stadium, e-Egypt. IChiefs isiyiphendulile incwadi yaveza ukuthi ngeke yenelisa ukudlala ngalolu suku kodwa ensukwini ezintathu ezizayo.”

Umbiko weChiefs lo uqhubeka usithi: “Izizatho ezimbili ezimqoka, yizinselelo zokuthola ama-visa lenhlelo zokuhamba. Njengoba sinikezwe izinsuku ezintathu, iqembu lisazokhangelana lenkinga ezifanayo emawofisini ase-Egypt ngoba kuthatha kusukela insuku eziyisikhombisa ukupasiswa kwe-visa ezasivumela ukuya e-Egypt. Ukuthola indiza ngemzuzu yokucina kuzaba nzima nanko amanye amankampani avaliwe ngenxa yemigomo yeCovid-19.

Share This:

Sponsored Links