uMthunywa
Nkosilathi Sibanda
AYANCIPHA amathuba okuthi iqembu lamaWarriors liyencintisa kunkezo yeWorld Cup nanko phela ukwehluleka kwalo ukunqoba kumidlalo emibili yalumkhankaso kuveza ukuthi akuyiwa ndawo.
IZimbabwe idliwe 1-0 yisizwe se-Ethiopia kubhola elihlohlwe nguAschalew Tamene ngombekwa ngomzuzu wesi-95.
Kumdlalo wakuqala ngoLwesihlanu olwedluleyo, amaWarriors adlale leSouth Africa kwaphela kungela qembu elihlohlileyo. Kuqula lika-G kulumkhankaso, amaWarriors asekucineni lapho alomklomelo owodwa. ISouth Africa isilemiklomelo emine, iGhana ilemithathu, Ethiopia layo iphethe emithathu.
Kuyacaca ukuthi indlela inde kubafana bamaWarriors.
Ukungadlali kuhle kweqembu sokudale insolo emulini yabalandeli bomdlalo. Bakhala ngokukhalipha komqeqetshi iZdravko Logarusic.
Umqeqetshi lo lokhe waphatha umsebenzi usenqobe kanye emidlalweni elitshumi lane.
Imbali iyakuveza ukuba akula omunye umqeqetshi owake wenza njengaye. Okuzadabula inhliziyo zabalandeli bethimu le yikuzwa uLoga esithi abadlali bakhe benze kahle.
Umqeqetshi lo ebuzwa ngemva komdlalo, uthe behlulwe ngunompembe.
“Sizamile ukudlala kuhle. Bakhona abadlali abenze amaphutha. Asizange sidanise abasekeli,” kutsho uLoga ese-Ethiopia.
“Asikhangeleni umdlalo ozayo. Silemidlalo emibili leGhana. Kumele sithole imiklomelo lapho.”
Kusenjalo abadlali bakaLoga bakhuthe imali ngokwehluleka ukunqoba e-Ethiopia. Bekulesithembiso sokuthi benganqoba bazaphiwa i-US$64 000.
