uMthunywa
Nkosilathi Sibanda
“Siyakwamula, sithi Kwamu Kwamu.”
Utsho lokhu ngezwi eliphezulu uMadlela Skhobokhobo esithi unxusa wonke umuntu kumcimbi wokwethula idlalade lakhe lesine mhlaka 1 Mabasa.
Ekhuluma lentatheli yephephandaba likazulu, uMadlela uthe abalandeli bakhe bazathola ukujabula okwedlulisileyo ngokulalela ingoma ezimunyethwe kudlalade lakhe elitsha.
Idlalade elitsha leli elibethwa ngesihloko esithi Kwamu Kwamu lizakwethulwa eKelvin Tshisanyama koBulawayo.
“Ngilibize ngathi Kwamu Kwamu idlalade lami elitsha. Lilengoma eziyisithupha ezihlasimulisa umzimba, zikwenze usukume udlale ngenyawo esitikini.
uMadlela Skhobokhobo
“Ngiliphathele ubunandi bodwa. Siyakwamula sithi Kwamu Kwamu,” kutsho uMadlela.
UMadlela sewakhipha amadlalade athi iDlozi Lolaka (2016), Majazana (2018) loNtikoloshi (2020).
Ubike ukuba idlalade lakhe lilengoma ezibalisa ezithi Kwaggafontein, Angihambi Ngedwa, Mama, The Crossing, Imali, lephethe isihloko esithi Kwamu Kwamu.”
“Angikaze ngikwenze lokhu. Ngiyethula idlalade leli elilengoma ezilendikimba ezigxile kukho konke esihlangana lakho empilweni. Mhla welanga lokukhitshwa kwedlalade ngizancediswa ngabantu engibabiza njengezikhokho kwezomculo. Ngikhuluma ngabaculi bodumo. Ngibabonga kakhulu ngokungiphathisa kwabo kulumsebenzi.”
Umculi weRhumba lo ubike ukuba wethula umsebenzi wakhe omutsha lo encediswa zingcitshi kwezomculo ezibalisa uMartin leNdolwane Super Sounds, Mark Ngwazi, Godolude, Zhezhingtonz, Skhosana Buhlungu, Mcebisi leqembu elibizwa ngokuthi Amathonga Amahle.
“Bonke abaculi laba ngiyabalandela njalo yibo abahlala bengikhuthaza ukuthi ngiphakame kulumsebenzi.
“Kuzajabula wonke umuntu. Angithi abalandeli bathi ngisondelele umculo weRhumba, sengikwenzile lokhu,” kutsho uMadlela. Wozani ngobunengi benu lisekela umhlabeli wenu, olithanda kakhulu,” kutsho uMadlela.
