Bhekimpilo Tshalibe
UHULUMENDE ubike ukuba useqalile umsebenzi wokwakha iNyongolo Multi-Purpose Community Centre eKezi, esabelweni seMatabeleland South kuhloswe ukulondoloza imisebenzi kowayenguMsekeli kaMongameli welizwe uJoshua Mqabuko Nyongolo Nkomo.
Isakhiwo lesi kubikwa sizagcwalisisa isifiso sikamuyi owayefuna ukuthi kube lendawo enjengale eKezi. Umuzi kaNkomo useKezi.
Umsebenzi wokwakhiwa kweNyongolo Multi-Purpose Community Centre uvele ngemva kokuxoxisana lokubonisana okwabakhona phakathi kukaMongameli uMnangagwa lenhlanganiso yeJoshua Nkomo National Foundation.
Lokhu kuvele ngesikhathi kubuthene abantu kukhunjulwa uNkomo enkundleni yeWhite City koBulawayo, ensukwini ezisanda kwedlula.
Umgcinisihlalo weJoshua Nkomo Trust Legacy Restoration Trust uMnumzana Mehluli Moyo uthe bancoma uHulumende ngalokho asekwenzile ekuvuseleleni umuzi wakoNkomo eKezi.
“Kuzadanisa nxa ngingehluleka ukuthi ngibabaze umsebenzi oncomekayo owenziwa nguHulumende emzini omdala kaDokotela Joshua Mqabuko Nyongolo Nkomo eKezi. Lokhu kungesinye isitshengiselo sokuthi uHulumende weZimbabwe usekela ibizo elithi Joshua Nkomo lenhlelo ezihambelana lalo,” kutsho uMnu Moyo.
UMnu Moyo uqhubekele phambili eveza ukuthi iJoshua Nkomo Annual Lecture ebiqhutshwa kuhle kusukela ngo 2017 kusiya ku 2019, incedisana logatsha lwezemfundo, izaqaliswa futhi lonyaka.
I-Joshua Nkomo Annual Lecture yakuqala yayiseJoshua Nkomo Polytechnic eGwanda ngo2017. Ngo-2018 yenziwa e-University of Zimbabwe, ngo-2019 yayiseMidlands State University.
“Siphinde sakhuluma lomphathi weMaster of the High Court ukuze sisebenzisane labo ekufundiseni abantu ngomthetho welifa. Ukuhlola kwethu kuveze ukuthi kulokuxabana okunengi phakathi kwamalunga ezimulini ngenxa yokungazi lokuswela ulwazi mayelana lomthetho welifa,” kutsho uMnu Moyo.
Uthe kulengxabano ezinengi esezibonakele njalo ezifuna ukulungisiswa masinyane.
“Njenge Joshua Nkomo Trust, sizazama ukusekela uHulumende futhi sinike amacebo azakhuthaza ukuthula, uthando lokubekezela elizweni lethu.”
