uMthunywa
ABATHANDI labalandeli bomdlalo wenguqu bazaphiwa ukudla kwamehlo ngokubukela imidlalo kumqhudelwano weDingumuzi Phuti Sports Fiesta ozaqhutshwa ngeviki elizayo koTokwana, eBulilima West.
Iphephandaba likazulu lizwe ukuba akubizwa ozwayo kulumbuthano wemidlalo ojonge ukuphakamisa intsha yakoTokwana ngelanga kuthakazelelwa ukuzalwa kukasaziwayo uDingumuzi Phuti.
UPhuti ngummeli weBulilima West ePhalamende, aphinde abengumsekeli kamphathintambo kugatsha lwe-Information Communication Technologies, Postal and Courier Services.
Mhla welanga kuzadibana futhi lamaqembu omdlalo wokuqaga abunjwe kuziqinti ezibalisa iMacingwane, Zimnyama, Dombolefu, Dombodema, Vulindlela, Malanswazi, Hingwe, Bambadzi, Ndolwane, Makhulela, Madlambudzi, Masendu leNyele.
Amaqembu la azadibana enkundleni mhlaka 15 kulinyanga koTokwana.
Ekhuluma lentatheli mayelana lomthimba wemidlalo lo, uPhuti uthe injongo yakhe yikuvulela abasakhulayo ithuba lokuthi batshengise ithalenta labo kwezemidlalo.
Kungumbono wakhe umkhokheli ukubumba abantwana abalembeko abazi ukuqakatheka kwenhlonipho lengqubekela phambili.
“Inhloso ngemidlalo le igxile ekuthini kumele sifundise abasakhulayo ngokuqakatheka kwemidlalo efana lenguqu lokuqaga. Ngithi kubo nanti ithuba lokuthi bazitshengisele emphakathini ngeziphiwo zabo,” nguPhuti lo.
Ngempelaviki edluleyo, uPhuti ubeqoqe imidlalo ehlanganise ama-ward onke alitshumi lantathu asesigabeni seBulilima West lapho aqinisekise ukuba ufuna ukuthi ezemidlalo ziqede ubuyanga, zilethe ingqubekela phambili.
“Ukudibana kwabontanga kumthimba lo kubanikeza ithuba lokuthi bacebisane, bakhuzane, babelane lamacebo okuphila.”
UPhuti uthe uzasekela imidlalo aphinde anikeze imvuzo kubanqobi.
“Imivuzo yemali esizayinikeza abanqobi izabancedisa ukuthi bavule amabhizimusi lokuqinisa imisebenzi yezandla ezabaphathisa empilweni,” kutsho uPhuti.
Uthe mhla welanga abasakhulayo bazathola inkuthazo ngokubaluleka kokubhalisa ukuvota.
