uMthunywa
YiNtatheli kaMthunywa
IQEMBU lenguqu eleBinga Pirates elidlala kuZimbabwe Football Association kumhlubulo ongezansi yelizwe likhangelelwe ukuthi limiswe phambi kwekhomithi ezalalela ukuthoniswa kwecala lokutshaywa kukanompembe uHardly Ndazi.
UNdazi watshaywa ngabadlali labasekeli beBinga Pirates ngesikhathi ebambe umdlalo weqembu leli leZPC Hwange ngenyanga edluleyo.
Unompembe wahlaselwa ngenxa yokuba kwaba lensolo ngendlela ayephethe ngayo lumdlalo lapho iBinga Pirates eyanqotshwa khona 2-1.
UNdazi wahlukuluzwa ngoba enike iZPC Hwange umbekwa owasolwayo.
Ngokuphuma kwembiko, kulelunga leBinga Pirates elafuqa uNdazi ngemva kwalokho abalandeli bahlasela unompembe.
Ngalokhu, umgcinisihlalo weZifa kumhlubulo ongezansi yelizwe uAndrew Tapela uthe bazahlalisa phansi iBinga Pirates.
“Ithimba le-disciplinary committee lizakhangela ngodaba lolu kuliviki. Sesike sayibhalela ithimu siyazisa ngalokhu.”
Andrew Tapela
UTapela uthe ikhomithi ezaphatha indaba le izasebenza izimele. “Manje umsebenzi ukukhomithi le. Nxa isiphume lesinqumo, kuzalandelwa sona,” kutsho uTapela. Ukutshaywa lokuhlukunyezwa kwabonompembe kwandile emdlalweni eminengi. Lakuligi ephakemeyo, kuPSL onompembe bathwele nzima ngokuthethiswa lokwethuselwa.
