Kuzabukiswa amasiko amaNdebele lamaTonga

Ethel Ncube

AKUBIZWA ozwayo ngeviki elizayo ngoLwesibili eDongamuzi, eLupane nanko kuzabe kulomcimbi omkhulu wokubukisa amasiko amaNdebele lamaTonga ngenhloso yokuvuselela amasiko la.

Emcimbini lo kuzabe kubukiswa ukudla kwesiNtwini lokwesiTongeni kubuye kubukiswe imigido, ukugqoka, impahla kunye lokunye okunengi okwemasikweni la omabili.

Induna ezivela esabelweni seMatabeleland North leMatabeleland South zikhangelelwe ukuthi zithi gwaqa emcimbini lo wokuhlanganisa lokuvuselela amasiko emihlobo le yomibili.

Intatheli ixhumane lenduna uMenyezwa onguye oqoqa umcimbi lo obike ukuba amalungiselelo omcimbi asezingeni eliphezulu.
“Umcimbi lo uzabe ubukisa impahla zesintu, ukudla, imvunulo kanye lemigido yesintu. Kuzabe kubukiswa amasiko esiTongeni kubuye kubukiswe lawaMaNdebele. Imihlobo le yomibili.

“Kuzabe kulezikolo ezibalisa iDongamuzi Primary, Dongamuzi Secondary, Siyamagoza, Guga leMzola 5 zizobukisa ezilakho okuphathelane lamasiko.

Ngikhuluma nje khathesi sihlangene lekhomithi silungiselela umcimbi lo. Omama bayasinda lapho okuzenzelwa khona umcimbi lo,” kulandisa induna uMenyezwa.

Uqhubekele phambili eveza ukubana umcimbi lo uzabe uvuselela amasiko.
“Amasiko aqakathekile kakhulu akumelanga siwalahle kumele siwaqakathekise kakhulu kungakho sisenza umcimbi onjengalo esiwulungisayo.
“Sinxusa wonke uzulu ukuba abuye azozikholisela esidla ukudla kwesintu, befunda okunengi ngamasiko,” kuphetha induna uMenyezwa.