uMthunywa
YiNtatheli kaMthunywa
ABADLALI benguqu abesifazane bathole ithuba lokuncintisana kumqhudelwano osekelwa nguFortune “Fokoza” Ncube enkundleni yeNtumbane ngeviki edluleyo.
Umqhudelwano lo unqotshwe yiHighlanders Royals ngowakuqala kunguqu engaphandle kwezikolo ukudibanisa ithalenta labadlali besifazane. IHighlanders Royals inqobe iMagwegwe Stars 4-2 kumbekwa. Amathimu womabili abambane nge 1-1 kumizuzu engu-90.
UNcube, odume ngelithi “Fokoza” kunguqu, wayengumdlali wenguqu osekhethe ukuba ngumqeqetshi walumdlalo, kulisizini useqoqe imbuthano emibili yokuphakamisa, okwenza abe nguye yedwa osehamba phambili ngosekelo lwethalenta labasakhulayo koBulawayo.
Amanye amaqembu anxuswe ukuncintisa kulumqhudelwano yiBiya & Friends leNtumbane.
Kulandela ukuqhutshwa kuhle kwemidlalo, inkokheli labaqeqetshi bamaqembu amantombazana babike ukuba okwenziwe nguFokoza kumele kuthole usekelo.
Umqeqetshi weqembu lesizwe amaMighty Warriors uSithelelwe “Kwinji 15” ukhuthaze amantombazana alethalenta ukuthi akhwabithe umdlalo.
“Imidlalo enjengale kumele isekelwe sibili, ikakhulu ngabadlali abazazi belethalenta lomdlalo. Siyabona ukuthi nxa kulembuthano yenguqu abadlali baphiwa ithuba lokuthi bahlangane labosaziwayo abazingcitshi zomdlalo, okwenza bathaphe ulwazi lezixwayiso. Simtshayela ihlombe uFokoza ngokuphakamisa ibhola labomama.”
Kusenjalo, uFokoza uthe uzaqhubekela phambili eqoqa imidlalo yabomama. Lonyaka uFokoza wenze umncintiswano wamaqembu abafana osudlule iminyaka emine uqhutshwa. Amaqembu anxuswe kulisizini alabadlali abaleminyaka yokuzalwa engu-14.
UNcube wadlalela iHwange FC, Bulawayo Chiefs, Black Mambas, Motor Action leBantu Rovers ngesikhathi esatshisa enkundleni.
