uMthunywa
YiNtatheli kaMthunywa
KUBOLE kuyanuka kunhlanganiso yeZifa nanko sekuvele ukuba amakhansila alinhlanganiso ayakuvuma ukuthi ayenikezwa imali ukuze avotele umkhokheli uFelton Kamambo.
Lokhu kuza ngesikhathi kuhlaziywa uphenyo lobugwelegwele okucatshangelwa ukuthi benziwa nguKamambo lezinye izikhulu kunguqu ukuze zithole izikhundla kuZifa. Ukudingisiswa kwaloludaba kukhokhelwa yinhlanganiso yeSports and Recreation Commission (SRC) incedisana lamapholisa eZimbabwe Republic Police.
UKamambo lamanye amalunga ebhodi yeZifa bavotelwa ngamakhansila, okuyiwo anikeza linhlanganiso umlandu wokusebenza. Amakhansila la aphuma kuzabelo zonke zelizwe lakungatsha zomdlalo wenguqu ezitshiyeneyo.
Kuvele ukuba iSRC iphethe udletshana olusindayo, olubeka kubemgceke ukuthi kuliqiniso ukuba amakhansila aphiwa imali ukuze aphakamise uKamambo labanye.
Isiqiniseko lesi, ngokutsho kweSRC sivela ekuthini akhona amakhansila esevumile ukuthi “afumbathiswa” imali.
Kuncwadi ethunyelwe isikhulumi seZifa uXolisani Gwesela, iSRC yazise ukuba amakhansila angamiswa umsebenzi.
“Siphethe imbiko etshiyeneyo ehlanganiswe ngamapholisa eZimbabwe Republic Police ukuze isetshenziswe ekutshutshisweni kwecala likamkhokheli weZIFA, uFelton Kamambo.
“Kuzo zonke lezi incwadi ezisayiniweyo, amakhansila eZIFA alotshwe kule incwadi, wonke ayavuma ukuthi afumbathiswa ngendlela eyodwa kumbe enye ngumsolwa, kanye labanye abancintisa kukhetho lweZIFA ngoZibandlela, 2018,” kubika iSRC kuncwadi edindwe mhlaka 17 Mpalakazi.
“Ngokwesigaba sika-30 somthetho weSports and Recreation Commission, isaziso sinikezwa linhlanganiso yikhomitshini ukuthi imise umsebenzi wonke amakhansila eZIFA alotshwe kulincwadi.
“Isizatho sokumiswa kwabo yikuthi bonke bavumile ukwamukela inkuthazo yaloba ngeyaluphi uhlobo, isukela kwabancintisayo ukuya kuhlelo lokhetho ikakhulu umkhokheli weZIFA okhona.”
Inhlanganiso yeSRC ithe amakhansila wonke anikezwe umhlaka 24 Mpalakazi ukuthi aveze iqiniso.UKhansila munye ngamunye uyacelwa ukuthi aveze isizatho sokuthi kungani i-SRC ingamisi esikhundleni.
“Banikezwe isikhathi kuze kube ngoLwesihlanu mhlaka 24 Zibandlela ngehola lika-12 emini, ukuthi baphendule ngokuqondileyo, ngokubhalela ku-SRC.
“Ngemva kwalokho, ikomitshini iyaqhubeka ngokumemezela isinqumo sayo.”
