uMthunywa
YiNtatheli kaMthunywa
ABALETHALENTA lokugijima imango emide sebephiwe elinye ithuba lokwenza imali futhi kumjaho walonyaka oweTanganda Half Marathon ozaqhutshelwa eMutare ekupheleni kwenyanga.
Inkampani yeTanganda Tea ehlawulela lumncintiswano ibika ukuba isivumela ukuthi labo abafuna ukugijima bebhalise.
Kulumjaho kukhangelelwe ukuthi kunxuswe abagijimi abedlula inkulungwane.
Kumbiko wayo ngalumncintiswano, inkampani yeTanganda ithe izaqhubekela phambili isekela umdlalo wokugijima, ikakhulu ikhangele ukuthi iphathise ekukhuliseni ithalenta elisacathula kulumdlalo.
Isikhulumi salumjaho uTsitsi Kumadiro oyisikhulu seTanganda uthe sekulindwe ukuthi kuyegijinywa.
“Umjaho walonyaka uzaqhutshwa ngeSonto mhlaka 29 kuNhlangula. Sinxusa wonke umuntu olamandla okugijima.
“Inkampani yeTanganda Tea ihlose ukuphakamisa umdlalo wokugijima kuleli ngakho sizahlala sisekela umdlalo lo.”
Kusenjalo uManuel Mpofu umgcinisihlalo wequla leBulawayo Athletics Board uthe ukhuthaza abagijimayo abaphuma edolobheni lakoBulawayo ukuthi babhalise kulumjaho.
Umncintiswano weTanganda awukaze unqotshwe ngabagijimi bakoBulawayo lokhe waphenduka kukhalenda yezokugijima kuleli ngo-2012.
Umncintiswano lo usetshenziswa ngabadlali ukuthi balungiselele eminye imijaho ebalisa owe-Econet Victoria Falls Marathon ozaqhutshwa ngoNtulikazi.
