uMthunywa
SELISONDELE ilanga lokuqala komqhudelwano wenkezo yomhlaba kumdlalo wenguqu eye-Fifa World Cup kodwa ukuvulwa kwemidlalo le kuze lembiko eyephula imimoya yabalandeli.
Imidlalo le izadlalelwa elizweni leQatar kusukela ngeSonto mhlaka 20 kusiyafika umhlaka 18 Mpalakazi.
Phakathi kokujabula okukhona ngokuqala kwenkezo yomhlaba le, kukhona osekuphume kumaphephandaba ase-Europe okulakho ukucunula abalandeli bomdlalo umhlaba wonke kuphinde kutshaphaze ukuphathwa kwalumncintiswano.
Kusukela ngomnyaka odluleyo, kuvele insolo zokuthi kuleziphathamandla zenhlanganiso yeFifa ezafunjathiswa imali ukuze umqhudelwano lo uqhutshwe elizweni leQatar. Ngakolunye uhlangothi, izisebenzi ezaqhatshelwa ukuthi zakhe inkundla zemidlalo zikhonona ngokuphathwa njengezigqili, zingabhadalwa imali eneleyo.
FIFA
Inengi lezisebenzi lezi kubikwa ngezivela kwamanye amazwe. Loba iFifa ingakakhiphi umbiko ngalokhu, owayengumongameli walinhlanganiso uSepp Blatter usanda kubika ukuba benza iphutha ngokunikeza iQatar imvumo yokuthi iphathe imidlalo yenkezo yomhlaba.
UBlatter, oleminyaka yokuzalwa engu-88 utshele amaphephandaba kwele-Europe ngeviki edluleyo ukuba iWorld Cup kwakumele iqhutshelwe eMelika, kodwa ngenxa yobungilimbane obabukhona, kwacina sekunikezwe ilizwe leQatar.
Ubeqala ukukhuluma lamaphephandaba kusukela ngoNtulikazi ngesikhathi esulwa icala lobugwelegwele kunhlelo zeFifa okubikwa watshontsha imali ezithile eloMichel Platini laye owake wabangumongameli weFifa.
“Ilizwe leQatar lincinyane kakhulu ukuphatha iWorld Cup,” kutsho uBlatter.
Uthe ukuze iQatar ithole umlandu wokuqhuba imidlalo, kwabaliphutha elenziwa ngowayengumongameli we-Uefa owaphinda wakhokhela njalo iFifa.
“Kimi kusobala, iQatar yabaliphutha,” nguBlatter lo ebikela iphephandaba leSwitzerland iTages-Anzeiger.
“Ngaleso isikhathi savumelana njengekhomithi ukuthi iRussia izaphatha umqhudelwano ka2018, besekulandela i-USA ngo2022.”
Kubikwa kunengi okuzaphawulwa nguBlatter mayelana lokuhanjiswa kweWorld Cup eQatar. Kulindwe ukuthi inkulumo zakhe zisakazwe ngokugcweleyo kumabonakude weNetflix kusukela kuyonale iviki.
Uluhlu lwamaqembu azadlala:
Group A
Qatar, Ecoador, Senegal, Netherlands
Group B
England, Iran, Wales, USA
Group C
Argentina, Saudi Arabia, Mexico, Poland
Group D
France, Australia, Denmark, Tunisia
Group E
Spain, Costa Rica, Germany, Japan
Group F
Belgium, Canada, Croatia, Morocco
Group G
Brazil, Cameroon, Serbia, Switzerland
Group H
Portugal, Ghana, Korea Republic, Uruguay.
