uMthunywa
YiNtatheli kaMthunywa
ABASAKHULAYO abalothando lomdlalo we-boxing eMatabeleland South sebenikezwe ithuba lokuthi bakhulise ithalenta labo kulumdlalo, nanko sekuvulwa inkundla yokulolonga abadlali.
Lokhu kuvezwe yisiphathamandla senhlanganiso yeZimbabwe Boxing and Wrestling Board (ZNBWCB) esabelweni seMatabeleland South uMaculwamahle Nkomo, othe baphezulu komkhankaso omkhulu wokuthapha ithalenta le-boxing emaphandleni.
Inhlanganiso le isiphosa amambule emaphandleni eMatabeleland South njengengxenye yemizamo yokuvuselela umdlalo wezibhakela lo.
Ekhuluma lephephandaba likazulu ngoMvulo, uNkomo uthe okwakhathesi bafuna ukugxila emphakathini wesiqintini seGungwe phandle kwedolobho leGwanda.
UNkomo uthe banengi abantu abafuna ukuphatheka kulumdlalo esabelweni seMatabeleland South.
“Okwamanje sizama ukusungula ikolitshi lapho okuzalolongwa abadlali esiqintini seGungwe. Kulabantu abanengi asebebike ukuba bakhwabitha ukufunda umdlalo lo, eGungwe lakwezinye indawo,” kutsho uNkomo.
“Indlela abakhwabitha ngayo i-boxing iyasikhuthaza lathi njengenhlanganiso ukuthi siphathise ngakho konke esilakho. Inhloso ngeyokuthi sikhulise umdlalo, siphakamise ithalenta emaphandleni.
Wrestling
“Okumqoka kulokhu yikuletha ingqubekela phambili eGungwe ngezemidlalo. Abasakhulayo sebezathola okokwenza, mhlawumbe bathole ukuthi bangaziphilisa ngomdlalo we-boxing.”
UNkomo uthe udubo olubabisela emuva yikungabi lomqeqetshi losekelo lwemali. Utshele uMthunywa ukuba banxusa labesifazane emdlalweni.
“Okusifuqayo kukho konke liphupho lethu lokuthi kwelakusasa kube lentshantshu eziphuma kulindawo. Asikhulumi nje ngabesilisa, sinxusa labesifazane ukuthi babe yingxenye yethu ku-boxing. Lo ngumdlalo wabantu bonke.
“Abasakhulayo badinga usizo lokuthi bazibonakalise kumathalenta abo kwezemidlalo efana le-boxing. Siyazi sonke ukuthi ukulwa ngezibhakela kujwayelekile emakhaya. Abafana abelusa izifuyo umdlalo wezibhakela bawazi kuhle ngakho siqala khonapho. Kumele basebenzise amandla abo, bathole ukuziphilisa nge-boxing.
