Nkosilathi Sibanda
USEKELO oluvela kunkampani yeNgwebu Breweries selufake umdlalo we-Tug-of -War ezingeni eliphezulu nanko isizwe seZimbabwe sesisungule iligi yalumdlalo ezancintiswa yizabelo zonke.
Kubikwa amathimu azimisele kulumdlalo asezaqalisa ukuthi alwele inkezo enkulu endaweni yokuthi aphatheke kumincintiswano embalwa phakathi komnyaka.
Iphephandaba likazulu liphethe udletshana lokuthi inhlanganiso yeZimbabwe Tug-of-War ikubone kufanele ukuthi iqhube iligi ukuze ikhulise lumdlalo.
Lokhu kuvele ngesikhathi amaqembu aziwa ezintshantshu zokudonsa intambo edibene enkundleni yeTrade Fair ngoMgqibelo odluleyo.
Iqembu leFBC Bank liphume libhuqe zonke itshantshu lonyaka. Iqembu leli linqobe iExide Battries kumdlalo wokucina ohlabuse inkundla ebigcwele phamu.
Labomama beZimbabwe Prison and Correctional Services (ZPCS) baqede bendiza ngomvuzo wakuqala kulumncintiswano obukelwe yinkundla ebigcwele phamu koBulawayo.
Inkampani yeNgwebu isime yaqina ngalumdlalo ohlanganisa amaqembu ayedlula amatshumi amabili.
Okumqoka lonyaka yikuphumelela kwamaqembu adabuka kwezinye indawo eziphandle kweMatabeleland, ikakhulu ezeHarare.
Inhlanganiso yeZimbabwe Tug-of-War Federation ibike ukuba isicente inkundla, okuseleyo yikubuthana kwabantu abadinga ukukholisa ukubukela ukuqina kwamaqembu.