uMthunywa
YiNtatheli kaMthunywa
UMLIMI wakoMasendu eBulilima uMnumzana Khuzani Dube, usendleleni yokuqhelisa amaphurojekithi akhe okulima ama-banana, amatamatisi kanye lokufuya ngokuvula indawo engaba ngama-acre amahlanu.
UMnu Dube kunye lomkakhe uNkosikazi Kagiso Ncube kunye lamalunga akhe emuli ayisificaminwe mibili lezisebenzi ezintathu baqhuba ibhizimusi ephumelelayo yokufuya kanye lezokulima abayiqala ngomnyaka ka2018.
Iphurojekithi yokufuya ilenkomo ezingu-28, izimvu ezingu-43 kanye lembuzi ezingu-14 lanxa zake zedlula i-50 zathengiswa ukuze kuqheliswe ibhizimusi.
Umlimi lo ulezihlahla zama-banana ezingu-200 lezamatamatisi ezedlula i-1 600 epulazini.
UMnu Dube uthe useqalisile ukutholisa izakhamizi imisebenzi ngephurojekithi yakhe.
“Ngilezihlahla zama-banana ezingaba ngu-200, ezamatamatisi ezingu-1 600 kanye lesivande semibhida. Nsuku zonke sithengisa amaphakethe afika 20 amatamatisi nge R10 elilodwa njalo sithengisela izakhamizi. Silezisebenzi ezintathu njalo isivande siyakhula kungenzeka siqhatshe ezinye izisebenzi ezingu-10 kusiya ku-15 abazaqhatshwa esigabeni.
“Sivula insimu engaba ngama acre amahlanu ngokwenza lokhu sikhangelele njalo ukuvula amathuba emsebenzini,” kutsho uMnu Dube.
