uMthunywa
Nkosilathi Sibanda
INHLANGANISO yeNational Athletics Association (Naaz) isincome ukuzimisela komdlali waseFolosi uPride Mafira ofike wenza irekhodi elihle ngokutshiya amadoda akhulileyo kumncintiswano yeWorld Para Athletics Grand Prix.
UMafira, ogijima efaka insingo kunyawo olulodwa, uleminyaka elitshumi lasithupha yokuzalwa. Usephiwe ibizo elithi “Blade Runner” ngabalandeli bakhe abambukele ethele isiqubu kumincintiswano yokugijima eqhutshelwe kwele-Dubai kumaviki adluleyo.
Umfana ubemncane kulabo bonke abagijimileyo kulumncintiswano odibanise intshantshu zabaphila lobugoga abaphatheka kumidlalo yokugijima.
UPride, osephenduke wabangusaziwayo ngesikhathi esifitshane nje, usegijima kubanga le-T44/F64.
Ngaphandle kokuvuthela ngesiqubu, uMafira wenze elinye irekhodi elihle ku-Long Jump ngokweqa amamitha amathathu.
Kumbukiso wokugijima kwakhe obonwe liphephandaba likazulu, uMafira uzamile ukuphutsha umango we-100m kodwa wehluleka ukuthi atshaye intambo ngesikhathi esivumela ukuthi aqhubeke ayencintisa ku-final.
Ugijime i-100m ngemzuzu eyi 17.66.
Inhlanganiso yeNaaz ibike ukuba ukugijima kukaMafira, sekutshengise ukuba ikusasa lomdlalo wokugijima kuleli livulekile.
UMongameli weNaaz uTendai Tagara uthe kuyancomeka okwenziwe nguMafira.
“Sikhuluma ngokuthi ikusasa yomdlalo wokugijima lihle njalo liyakhanya nxa siqhubeka sivumbulula ithalenta elifana lelikaPride Mafira. Simtshayela izandla umfanyana. Kubanga lokuncintisa kwabaphila lobugoga akwandisanga ukuthi kube lomuntu oleminyaka enjenge yakhe. Siyamkhuthaza ukuthi aqhubekele phambili.
Umfana lo, ungene kuqembu lesizwe ngomnyaka ophelileyo njalo ukhangelelwe ukuthi ayencintisa lakuma-paralympics azaqhutshwa edolobheni leTokyo,” kutsho uTagara ekhuluma loMthunywa ngoLwesibili.
Ngaphadle kokubonakala esenza kuhle eDubai, uMafira usencintise kwele-South Africa lapho aphenduka ethwele isicoco segolide kumincintiswano etshiyeneyo.
Uphume kumabonakude esithi ukuncintisa eDubai kubeyisiqalo sokuthi aphatheke enkundleni zaphezulu lokhe waqala ukugijima. “Ngikhangelele ukuyakhatshana ngesibanga engikuso. Ngifunde okunengi ngokuncintisa ku-World Para Athletics Grand Prix.”
UMafira uqeqetshwa nguyise uFredrick.
