Uncategorized

Kutshone obelinda intaba yezulu ePlumtree

06 Jun, 2024 - 00:06 0 Views
Kutshone obelinda intaba yezulu ePlumtree AmaWhosanas ehlonipha umuyi obelinda intaba yezulu ePlumtree

uMthunywa

Yintatheli kaMthunywa

KWEHLE iyezi elimnyama kumuli yakoDube ngesikhathi kutshona umuntu obengomunye wabanikazi bentaba yeManyangwa eBulilima ngoMvulo kunsuku ezisanda kwedlula  ngemva kokugula isikhatshana.

Umuyi uMnumzana Guttone Thobela Dube udlule emhlabeni eseleminyaka engu-66 yokuzalwa. Utshiye abantwana abane emhlabeni.Umuyi ubekhangela intaba yeManyangwa esemgwaqweni weNdolwane, ePlumtree. Abantu babuthene emzini wakhe eTjehanga.

Intaba le yikho obekusenziwa khona isiko lezulu ngesiKalanga.

Isikhulumi esimele imuli uMnumzana Twoboy Manyangwa nguye obike ngokudlula kukamuyi emhlabeni

“Ubengezwa kuhle okwesikhathi eside njalo ubhubhe ngoMvulo ekuseni emzini wakhe. Besilokhe simhambisa esibhedlela kodwa kungabi lenguquko.Isimo sokugula kwakhe siqale ukuba sibi ngeviki ephelileyo ngiyambona wafika wangitshela ukuba usehamba.Wathatha igwayi lakhe wakhuluma wathi lamadlozi wathi usevumile ngemva kwalokho waphefumula okokucina wadlula ezweni,” kubika uManyangwa.

Umuyi wabika ukuba yena engafa akumelanga ahambe emotsha kodwa sicine sisenza isiko singakahambisi umzimba wakhe emotsha yakoBulawayo ukuze inengi labantu lenelise ukumbona labangaphandle kwamazwe benelise ukufika bezombona.

Omunye wabancediswa ngumuyi ugogo Sanelisiwe Ndebele ubike ukuba yena walayelwa intaba le ephutshweni.

“Ngilobizo lwamadlozi njalo ngangilobunzima empilweni.Ngalayelwa intaba le ngayitshengiswa ephutshweni. Umuyi ubelenhliziyo enhle njalo wangamukela kuhle wazwisisa uhlupho engilalo.NgiseMzansi Afrika sizama ukulungiselela ukuthi sibuye singoThobela singabantu bewosana,” kubika ugogo uMaNdebele.

UMnumzana Anderson Sole Moyo weKalanga Language & Cultural Development Association ubike ukuba uManyangwa wadlala indima ebalulekelileyo,

“Ukufa kwakhe kuzavimba intuthuko, ubedlala indima yakhe ku-shrine, ukuthola umuntu ozathatha indawo yakhe kuzathatha isikhathi.Okhangela intaba nguye obebathatha ebahambisa entabeni esiyabika ebuye lempendulo. Abewosana bonke elizweni bebebuya entabeni umuyi kunguye oyikhangelayo,” kubika uMnu Moyo.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds