uMthunywa
YiNtatheli kaMthunywa
ABAKADE belinde ukuqala kwesizini yeCastle Lager kanobhutshuzwayo bazagcwala inkundla loba nje inhlanganiso yePSL ikhweze imbadalo yokubukela imidlalo.
Ukungena enkundleni sekusukela ku$5, imali abalandeli bomdlalo koBulawayo ababike ukuba ilingene.
Kulimpelaviki bazaqala ukuyikhipha i$5 le kuvulwa zonke inkundla ngemva kwekhefu eledlula inyanga ezimbili.
Abalandeli bomdlalo abakhulume lephephandaba likazulu bathe isizungu sesiphelile, balinde ngelibomvu ukubukela yonke imidlalo.
“Sengilinde kakhulu ukubona ithimu yami iHighlanders idlala. Ngizayilandela kumdlalo wayo leBlack Rhinos khonale eHarare,” kutsho uQuinton Siwela obika ukuba ungumsekeli weBosso.
UKenias Nyoni weCowdray Park uthe ukukhwezwa kwembhadalo yokubukela akumkhathazi.
“Ngiyangena ebholeni loba lingaze libe yimalini. Inguqu isegazini kimi okokuthi kunzima ukwehlukana layo,” kutsho lumbukeki womdlalo.
Labadlali abaseKezi, Lupane, Hwange laseFolosi abaxhumane lephephandaba likazulu bathe bazagada amabhasi belanda amaqembu abo.
USifiso Dungeni oweMaphisa uthe kakaze akhuthe umdlalo weHighlanders kusukela ngomnyaka ka2000.
“Yebo, usuqala umdlalo. Kuyathabisa ngoba ukuhlala ubala ngokwenzakala eqenjini ungakaze ulibone akujabulisi. Sengizaqogelela imali yami yebhasi leyokungena maviki onke ngizibone ngiseBarbourfields.”
NgoLwesihlanu iHarare City leFC Platinum zivula inkundla ngokuba ngezokuqala ukungqikilana.
Ngokuvulwa kwesizini, iHighlanders iqonda eNational Sports Stadium isiyadibana leBlack Rhinos ngoMvulo.
Nxa iBosso inganqoba, lo ngumdlalo ozasondeza umqeqetshi weBosso uMadinda Ndlovu eduzane labalandeli bethimu.
Umqeqetshi lo sekuvele ukuthi uyenelisa ukuhlanganisa umdlalo wabasakhulayo.
Amalungiselelo eChicken Inn aqhube kuhle lapho leliqembu elifike laseMalawi lidinga ukuqinisa abadlali ngemidlalo yobungane lamaqembu akulelo.
Intshantshu zika2015 lezi zidlale ibhola kuzwa kusukela ngoZibandlela, okuyikhona okuzafaka isitha sazo iZPC Kariba intshukuntshu ngoMgqibelo eLuveve.
Kusenjalo iqembu leTelOne seliqhatshe uJairos Tapera ukuthi aliqeqetshe.
UTapera uthatha umsebenzi kaJoel Luphahla osephakanyiswe wabangumaneja omkhulu weqembu.
ITelOne izadlala leHerentals eRufaro Stadium ngeSonto.
UMthunywa uxhumane loTapera ngoLwesithathu.
“Konke kuhamba kuhle enkambeni. Ngifice iqembu lilolonga ngaphansi kwezandla ezinhle, ngithathela phezulu nje. Umdlalo wethu wakuqala uzatshengisa ukuthi sizimisele njani ukugcina indawo yethu kuPSL,” nguTapera esengeza ngokuthi ibhola lenkabazwe lizahlasimulisa lonyaka.
Nxa iBosso inganqoba, lo ngumdlalo ozasondeza umqeqetshi weBosso uMadinda Ndlovu eduzane labalandeli bethimu.
Isikhulumi sePSL uKudzai Bare wethule umbiko wokuthi abalandeli bomdlalo abakhulukele ukuyagcwala enkundleni.
UBare uthe inhlanganiso yakhe yenze kuhle ngokukhipha uluhlu lwemidlalo yalisizini ngokuphangisa ngoba kwenze kwabalula kubalandeli ukuthi balungiselele.
Imidlalo ngeviki lakuqala:
NgoLwesihlanu:
-Harare City v FC Platinum (Rufaro Stadium)
NgoNgqibelo:
-Black Rhinos v Highlanders (National Sports Stadium)
-Chicken Inn v ZPC Kariba (Luveve Stadium)
-Mushowani Stars v Dynamos (Rufaro)
-Chapungu v Bulawayo Chiefs (Mandava)
NgeSonto:
-Caps United v Manica Diamonds (National Sports Stadium)
-Triangle United v Ngezi Platinum Stars (Gibbo Stadium)
-Hwannge v Yadah (Colliery Stadium)-
-Herentals v TelOne (Rufaro).
