Uncategorized

Kutsha izindlu-11 kumlilo oyindida

09 Sep, 2021 - 00:09 0 Views
Kutsha izindlu-11 kumlilo oyindida

uMthunywa

Thokozile Mbedzi
KULEMULI yeKariangwe eBinga esele isegcekeni kulandela ukutsha kwezindlu zayo ezingu-11 egumeni layo okubangele ukuthi isale ingela ngitsho sona isichibi ngeviki ephelileyo.

Abemuli kunye lezakhamizi basele benkemile ngemva kokuzama ukulwisa umlilo obehlule watshisa izindlu lezi ngesikhatshana nje kwasala kungumlotha iguma lonke.

Ngokutsho kwezakhamizi umama walelikhaya ubesemhlanganweni lezinye izakhamizi ngesikhathi umlilo lo uqala.

Kukhanya ekhaya bekusele uVienna Mudenda oleminyaka yokuzalwa engu-28 labantwana abathathu ngesikhathi kuqala umlilo lo ngehola lika 11 ekuseni.

Ekhuluma lentatheli uMnumzana Daniel Mudimba uthe amashwa ehlele imuli yakoMudenda atshiye wonke umuntu emadolonzima.

“Besisemhlanganweni okungaba yisibanga esingangamamitha angu-800 lomuzi wakoMudenda. Sithe sisaphathekile nje sabona sokuthunqa intuthu emzini lo sahle sagijima sisiyakhona lomama womuzi  ebesilaye emhlanganweni.

“Sithe sifika sabona uVienna ephuma endlini labantwana begijima.

“Sisathi sikubonile, enye njalo indlu yesibili yalumatha esihlothini kwalandela enye andubana kutshe zonke zindlu ezingu-11 egumeni.

“Silusizi ngoba sehluleke ukukhupha loba ulutho ezindlini yiloba besibanengi. Sihle sabikela amapholisa ngodaba lolu ngoba silapha sizwa ubuhlungu ngoba imuli yakoMudenda isele egcekeni kungela lutho olungabaphathisa, kulandisa uMnu Mudimba.

Isikhulumi samapholisa esabelweni seMatabeleland esabelweni seMatabeleland North uInspector Glory Banda ebuzwa ngodaba lolu uthe solufikile ehofisini labo.

Share This:

Sponsored Links