uMthunywa
YiNtatheli kaMthunywa
KUVELE sobala ukuthi okulempondo akufihlwa emgodleni ngesikhathi amapholisa eMatopo esigabeni seNtunjambili ebamba umuthi wamasela abesehluphile esigabeni lesi okucatshangelwa ukuba yiwo obubenza baphunyuke bephethwe.
Kuzwakale ukuba ngesikhathi amapholisa etshisa umuthi lo ngeviki ephelileyo, indlu yelinye lamasela la imane yalumatha umlilo yatsha kwatshabalala impahla yonke.
Kubikwa amasela la atholakale lempahla ezitshontshiweyo ezigoqela amakhompuyutha, ukudla kanye lempahla zokugqoka.
UMthunywa uzwe ukuba amapholisa ngesikhathi ethola lezimpahla ezitshontshiweyo babona kulomuthi okucatshangelwa ukuba yiwo akade bewusebenzisa ekutshontsheni bawuthatha bayawutshisa. Kubikwa ngesikhathi umuthi lowo usitsha kutshe indlu yelinye isela.
Ekhuluma loMthunywa omunye wezakhamizi uMnumzana John Dube uthe sebezake baphumule esigabeni ngoba amasela la abesehluphile.
“Amasela lawa afika ezitolo kungani ngabantu abazothenga kanti bazama ukuzotshontsha omunye olesitolo kule indawo wahle wasola wathi abantu laba ukwenza kwabo kakuzwisisi akuthathanga lehola unkazana wesinye isitolo wathi sekutshontshiwe wagijima waya emapholiseni.
“Amapholisa ahle asukumela phezulu acela ukuncendiswa sababamba omunye wakhona kuthiwa nguJudas,” kuveza uMnu Dube.
Uqhubekele phambili eveza ukuba ngesikhathi sebebanjiwe kwahle kwayathathwa konke ababelakho.
“Amapholisa ahamba ayathatha okwakutshontshiwe kwatholakala ama-laptops, ukudla, impahla zabantwana zesikolo ngoba babetshontsha lasezikolo.
“Okunye okwatholakalayo ngumuthi ababewusebenzisa nxa besiyatshontsha ukuba bengabanjwa. Umuthi lo uthethwe wayatshiselwa enkambeni yamapholisa njalo isimanga kube yikuthi ngesikhathi usitsha kutshe indlu yelinye isela,” kutsho uMnu Dube.
Ekhuluma lentatheli omunye wezakhamizi zakule indawo uNkosazana Otilia Ndlovu uveze ukuba indaba enjalo iliqiniso.
“Amasela la abanjelwa khonapha ezitolo, thina sasilokhu sizidlela amabele ethu sabona sekuhanqwa abantu kanti basebetshontshile.
“Amapholisa ahle agijima aya emzini wabanye babasolwa laba ayathola impahla ezitshontshiweyo ngoba batshontsha ezindaweni ezinengi ezitshiyeneyo. Kwatholakala umuthi kuthiwa yiwo ababewusebenzisa ukuze bengabanjwa bawuthatha bayawutshisa kwatsha indlu ngesikhathi usitsha,” kubika uNkszn Ndlovu.
Intatheli ixhumane lelinye ipholisa elingathandanga ukuqanjwa ngebizo kodwa eliveze ukuthi udaba olunjalo lwenzakala njalo okwakhathesi solusemthethwandaba.re
