uMthunywa
YiNtatheli kaMthunywa
IQEMBU leHighlanders liphakathi kwetshe lembokodo ngodaba lokudinga usekelo lwemali lokugcina umqeqetshi walo uHendrik de Jongh.
Umqeqetshi lo uqedelana lomsebenzi ekupheleni kwalinyanga.
Umgcinisihlalo weBosso uKenneth Mhlophe wazise leliphephandaba ukuba bayazi mhlophe ukuba umqeqetshi wabo usefulathela iqembu kodwa bona njengenkokheli bafuna ukuthi aqhubekele phambili ngesizini ezayo.
Ekhuluma lephephandaba likazulu kungxoxo ebimayelana ngemibono yakhe kulisizini, uMhlophe uthe okwenzakale kulisizini kube yisimanga ngenxa ka De Jongh.
Uthe balala bengalele bedinga iqhinga lokuvuselela usekelo lweholo lomqeqetshi lo ngoba kungenzeka ahluthunwe ngamanye amaqembu alemali.
“Umqeqetshi wethu silaye. Siphezulu kokulungisisa udaba lwakhe ngoba simfuna esenkambeni yethu,” kutsho uMhlophe kuliviki.
Umgcinisihlalo wazise abalandeli ukuba ababekezele.
“Ngesikhathi esifaneleyo sizabika kuzulu ukuthi ikusasa lethu lomqeqetshi lime njani. Into esingayifuniyo yikutatazela. Siliqembu elibekekileyo, elaziwa ngobungcitshi bokwenza umsebenzi, ngakho ngithi kubalandeli bethu, abathembe ukuthi kuzalunga ngoba yonke into isehlelweni ngesizini ezayo.”
UMhlophe unikeza impendulo le kulandela ukwanda kwamahungahunga okuthi uHlabangana useyifulathela ekaMatshobane elubhekise kumaqembu alemali engcono. Phakathi kwamaqembu la kubaliswa iFC Platinum leNgezi Platinum.
Ebuzwa ngalokhu, umqeqetshi uthe angeke aphendule.
Kusenjalo, ngemva kokubika ukuba kuzakuba lomcimbi omkhulu wokubonga abadlali, uMhlophe uthe akulanto angayisola ngokudlala kwethimu loba iqede ikunombolo yesihlanu.
Ngokutsho kwalumgcinishlalo, iBosso ibikhangelelwe ukuthi iphethe isizini igijimela kweziphansi ngenxa yokuthi umdlalo wayo ubungatshengisi impumela.
Leli liqembu eliqede phose ingxenye yesizini lisadalala likunombolo yetshumi kusiya phansi kodwa iphethe isisenza izimanga.
UMhlophe uthe uzababaza kakhulu ukuba iqembu lenza kuhle ngokunqoba isitha esidala iDynamos, ukuthwala inkezo yeChibuku okwaba yinto eyahlasimulisa abalandeli balo okwamagama.
Umgcinisihlalo lo uthe okwenza atshayele iqembu ihlombe yikuthi baqhubeke bedlalisa abafana abasakhulayo.
“Umsebenzi owenziwe ngabadlali bethu bonke kanye labaqeqetshi uyancomeka. Singabe sehlulekile ukuthi siqede siphezulu kodwa ukudlala kwabafana kusithabisile. Asikhangelisisi inhloso yethu ngoba okuqakathekileyo yikuthi sanqoba imidlalo ethile eyayibalulekile,” kutsho uMhlophe.
Loba engazange akubeke egcekeni, uMhlophe welule ukuba kuzamele babonge abadlali babo abenze kuhle.
IHighlanders icine ukwenza umcimbi wabadlali ekupheleni kwesizini ka2016 ngesikhathi isasekelwa libhanga leBancABC. Okwamanje iBosso isekelwa yiNetOne.
“Ukuba khona kweNetOne kuyisibonelo sokuba iHighlanders yenza kahle kunguqu njalo iliqembu amankampani afuna ukusebenzelana lalo. Siliqembu elaziwa ngokuqhuba inhlelo zayo ngobunono, ngakho nxa inkampani enjenge-NetOne isisekela, kutsho ukuba senza kahle.”
UMhlophe uthe ubudlelwano babo lenkampani yeNetOne kwengeze okunengi kuqembu ngoba belingeke lenelise ukuncintisa ngesikhwama esincinyane.
Uthe ubonga abalandeli ngokugcwalisa kwabo inkundla.
“Ngithanda ukubonga abasekeli bethu bonke ngokungena kwabo eBarbourfields ikakhulu kumdlalo wethu sileDynamos. Kuyo yonke imidlalo abadlali kubakhuthazile ukuthi banqobe, bazethembe njalo. Siyabonga maBosso amahle,” nguMhlophe lo ekhuluma lephephandaba likazulu kuliviki.
“Kubalandeli bethu usekelo lwabo aluqhubekele phambili. Nxa abasekeli bethu kwezemali bebona ukubambana kwabalandeli, kuzenza kube lula ukuthi bahlale belathi,” kutsho uMhlophe ekhuluma lephephandaba likazulu kuliviki.
