uMthunywa
YiNtatheli kaMthunywa
KUYABE kungabizwa ozwayo enkundleni ye-Etihad Stadium lapho intshantshu zeligi yeNgilandi iManchester City zidlala labakhokheli beligi le okwamanje iLiverpool.
Lumdlalo ufana lokuthi yiwo owokucina kuligi le nanko phela ziyalandelana kulogu njalo phakathi kwazo yikho okuphuma khona intshantshu yakulisizini.
Umdlalo wesigaba sakuqala wadlalelwa ekhaya leLiverpool okwaphela ngeqanda kuwo wonke amaqembu womabili. Abalandeli beCity basala bethwele izandla ngekhanda ngemva kokuba umdlali wabo omutsha uRiyad Mahrez ekhutha umbekwa ngesigaba sesibili somdalo.
Umdlalo lo uyabe ungumdlalo wokuqala womnyaka ka2019 wamaqembu la, iLiverpool ibuya eEtihad ithe ngqe phezulu kuligi yona iCity ikunombolo yesithathu. Zehlukaniswe ngamaphuzu ayisikhombisa ngemva kokudlala imidlalo engamatshumi amabili.
Umqeqetshi weManchester City uPep Gaudiola uthe lumdlalo yiwo ongavulela iLiverpool amathuba okuthi yenelise ukuthatha inkomitsho yeligi njalo ukholwa ukuba abadlali abafana loDe Bruyne loMendy kumele bebekhona emdalweni.
“Lumdlalo obuyayo umkhulu kumaqembu womabili njalo iLiverpool inganqoba kuyabe sekukhangelelwe yona ukuthi ithathe inkomitsho kule isizini ngoba bayabe sebevule isikhala esikhulu phakathi kwabo leqembu elilandelayo iTottenham Hot Spurs, angazi ukuba abadlali abafana lo De Bruyne loMendy baselula lapho abathinteka khona, ngakho angikwazi mhlophe ukuba bazodlala,” kuchaza uPep.
ILiverpool yona ibuya kulumdlalo itshisa ivela ukuyatshaya iArsenal induku ye 5-1 enkundleni yeAnfield emdlalweni wabo odlalwe ngoMgqibelo odluleyo.
Umqeqetshi weLiverpool uJurgen Kloop uthe kuzamele abafana bengayehlisi “i-oil” bebuye ngokuzimisela ababelakho bedlala leArsenal emalangeni adluleyo.
“Umdlalo weCity ungumdlalo omkhulu wale isizini ngakho ngikhuthaza abadlali ukuthi sibuye ngamandla esadlala ngawo kumdlalo wempelaviki leArsenal. Ukuwina iligi sisakhatshana ngoba kusalemidlalo eminengi njalo kusele lenyanga ezine kunengi okungenzeka,” kuphetha lumqeqetshi. —Ubulembu
