Kuthathwa ikhefu kancane

30 May, 2024 - 00:05 0 Views
Kuthathwa ikhefu kancane uJoey Antipas

uMthunywa

Nkosilathi Sibanda

ILIGI yeCastle Lager Premier Soccer League izathatha ikhefu lamaviki amathathu ukuze kuqhutshwe imidlalo yeWorld Cup qualifiers lomqhudelwano wenkezo yeCosafa.

Akusoke kube lemidlalo kusukela mhlaka 1 Nhlangula kusiyafika umhlaka 22.

Umdlalo ozakuba khona ngoweHerentals leBikita Minerals. Inhlanganiso yePremier Soccer League ibike ngoLwesibili ngalokhu.

“IPremier Soccer League izathatha ikhefu kusukela mhlaka 1 kuNhlangula 2024 ukuze kuqhutshwe imiqhudelwano ezayo yenkezo yomhlaba yeFifa kunye lomqhudelwano wabesilisa oweCosafa.

“Ngalesi isikhathi, umdlalo owodwa kuphela phakathi kweHerentals College leBikita Minerals uzadlalwa mhlaka 1 Nhlangula, enkundleni yeRufaro. Imidlalo yeCastle Lager PSL izaqhubekela phambili ngoMgqibelo mhlaka 22 Nhlangula,” kubika iPSL.

Kusenjalo, abanye abaqeqetshi bamaqembu akuPSL banikeze iZimpapers Sports Hub imicabango yabo ngekhefu.

Umqeqetshi we-Arenel uFarai Tawachera uthe bazanika abadlali babo ikhefu leviki ngaphambi kokuthi babuyele ekuzilolongeni.

“Ngikholwa ukuthi njengeqembu besilokhu sithuthuka. Ikhefu selifikile njalo ngeke sikwazi ukulibalekela. Kungahle kusisebenzele kakuhle, njengoba ngithe siyathuthuka kancane kancane.

“Kumele sinanzelele ngoba ikhefu lingabhidliza indlela esibumbe ngayo iqembu kodwa siyathemba ukuthi ngeke kwenzeke lokhu. Ngithemba njalo ukuthi sizaqhubeka ngokwenza kuhle. Isikhathi sekhefu lithuba lokuthi sivuselele amandla njengeqembu,” kutsho uTawachera.

Umqeqetshi weChicken Inn uJoey Antipas uthe bazasebenzisa ikhefu ukulungisisa amaphutha abo.

“Likhefu lapho okumele silungisise iqembu. Abadlali bethu bazathola ikhefu lensuku eziyisikhombisa ngemva kwalokho sibuye sizololonga ukuze silungise izinto esingazenzanga kuhle kumidlalo elitshumi lane yokuqala yesizini,” kutsho uAntipas.

Umqeqetshi weqembu leBulawayo Chiefs uThulani Sibanda uthe: “Ikhefu liza ngesikhathi esifaneleyo. Ngicabanga ukuthi kuhle ngendlela yokuthi sizavuselela iqembu. Leli lithuba lokuthi sisebenze ekuqiniseni imizimba yabadlali. Ngikholwa ukuthi sizaphuma kukhefu sileqembu elingcono.”

AmaWarriors azakwamukela iLesotho emdlalweni wenkezo yomhlaba ka-2026 e-Orlando Stadium eGoli, eSouth Africa mhlaka 7 Nhlangula. Ngemva kwalokho bazadlala leSouth Africa eFree State Stadium, eBloemfontein mhlaka 11 Nhlangula.

Umqhudelwano weCosafa uzalandela ngemva kwemidlalo yeWorld Cup.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds