uMthunywa
Nkosilathi Sibanda
ABACULI bakoBulawayo badinga ukusekelwa emsebenzini wabo ngoba lokho kuzabasiza ukuze baphume esimeni sabo somnotho, baqale ukwakha amabizo.
Lo ngumbono kaBongani Mkhwananzi ophakathi kokuqoqa umcimbi omkhulu obizwa ngokuthi yi-0292 Festival. Kulumcimbi ozaqhutshwa mhlaka 4 Lwezi, uMkhwananzi usebenzelana lequla le-Kulture Decoded Podcast.
Umbono kaMkhwananzi lo uza ngesikhathi inengi labaculi koNtuthu likhonona ngokuthi liphila nzima njalo kalitholi imali losekelo olwaneleyo.
“Abaculi bethu koBulawayo, labo bonke abenza umsebenzi wokuthokozisa uzulu badinga usekelo lwethu. Ngempela abalutholi ngokwaneleyo usekelo, yikho siqoqa umcimbi we-0292 Festival ngoba sigxile ekuphakamiseni ithalenta ledolobho,” kutsho uMkhwanananzi, ngesikhathi ekhuluma lentatheli yephephandaba likazulu ngoMvulo.
“Inhloso yethu yikunikeza abaculi ithuba lokuzitshengisela. Yebo ingabe ikhona eminye imicimbi kodwa owe-0292 Festival wehlukene ngokuthi uzakuba lesisindo esizaphakamisa abaculi bonke.
“Kulumcimbi sibambane lequla le-Kulture Decoded Podcast lapho esifuna ukuthi sincedisane ekwakheni umculo wakithi.”
Isikhulumi se-Kulture Decoded Podcast uBrintz uthe sebeqalile amalungiselelo womcimbi.
“Njenge-Kulture Decoded Podcast sesakhuluma lenengi labantu bakoBulawayo abaphatheka kumisebenzi yokucula, amasiko, ifeshini, osomabhizimusi labosaziwayo. Khathesi sithe sitshintshe igiya seqele kwezokuqoqa imicimbi yomculo, yikho sisebenzelana loBongani Mkhwananzi ukuqoqa i-0292 Festival,” kutsho uBrintz.
UMkhwananzi uthe balokuthaba ekuthini banengi abaculi abafuna ukuphatheka kulumcimbi.
“Uluhlu lwabaculi abangena enkundleni lude. Banengi abafuna ukuzocula. Kuyasithokozisa ukuthi abaculi laba bakubona ukuqakatheka kokusebenza ndawonye njengabantu bakoBulawayo, siyakubongela lokhu.”
Ebuzwa ngokuthi yibaphi labo baculi, uMkhwananzi uthe bazaphendula lokho ngokuya kwesikhathi.
“Siphethe abaculi abalodumo lalabo abasacathula. Amabizo abo asadula okwakhathesi, angeke sihle sithi bhadla, kodwa sithembisa ubunandi,” nguMkhwananzi lo.
“Kwelakusasa sifuna ukuthi umcimbi we-0292 Festival ukhule uze ufike ibanga lokuthi ubangumcimbi olindelwe ngumuntu wonke. Abaculi kumele bathole impilakahle lokuhlaliseka ngokuphatheka emcimbini lo.”
Uthe ngaphandle kokuxhasa abaculi, umcimbi we-0292 Festival uzaphakamisa labosomabhizimisi ababalisa abathengisi bokudla, abathungi bempahla labanye.
“Silethemba lokuthi umcimbi wabaculi lo uzaphakamisa idolobho lakoBulawayo kundawo ezitshiyeneyo. Bakhona abalamabhizimusi asakhula abagoqela ukupheka ukudla, abatshayeli bezimota ezithwala abantu, abathungi, labanye nje abakumabhizimusi asondelelane lokuthokozisa uzulu.”
