uMthunywa
Nkosilathi Sibanda
UMARVELOUS Nakamba usenxuse amankampani ukuthi ahlanganele laye ekwakhiweni kwenkundla yezemidlalo ngaphansi kweMarvelous Nakamba Foundation (MNF).
Ekuqaleni kuka-2020, uNakamba wacela indawo kukhansili yakoBulawayo ukuze akhe indawo ezanceda ukuthuthukisa ithalenta labasakhulayo lokwabela ulwazi ngezempilakahle.
Ikhansili yakoBulawayo yanikeza umdlali wasesiswini we-Aston Villa lo, imvumo yokwakha indawo yakhe yemidlalo engamahekitha angu-5,1 elokitshini leMahatshula South ngoMpandula ngomnyaka ka2020.
uMarvelous Nakamba
Kumbiko wakhe kuntatheli uNakamba uthe inkundla yemidlalo ezakwakhiwa izaphatha imidlalo etshiyeneyo. Uthe lokhu kuyingxenye yendlela yakhe yokuncedisa umphakathi lokuthuthukisa intsha.
Inhlanganiso yeMNF ibike ukuba ifuna ukuthi intsha ilandele ezinyaweni zikaNakamba. Ngokufuqwa yisifiso sokuphakamisa abasakhulayo, i-Foundation ihlose ukusebenza labadlali bebhola kungakhathalekile ukuthi bavela kuliphi iqembu.
Konke lokhu kuzafuna ukubambisana lomphakathi wakoBulawayo labosomabhizimusi.
Ngokunjalo, usuqalile umsebenzi wokugebha umhlaba lapho okuzakhiwa khona.
“Ngeke sakutsho ukuthi uhlelo lolu luzagqitshwa nini njengoba konke kuzakhokhelwa yikutholaka kwemali ngemva kokuhlolwa kwesigaba sokuqala. Njengoba lokhu kusenzakala emphakathini wakoBulawayo, indawo le izaba yisizinda sesizwe kwezemidlalo.
“Ngaleso sizatho, i-MNF ayikwazi ukuzenzela yodwa. Sizakuba labancedisi, amankampani loba abantu, abalephupho elifanayo,” kutsho umbiko ovele kuMNF.
Inhlanganiso le ithe ifisa ukuqhuba imidlalo yaphezulu kumidlalo ebalisa ibhola lenyawo, i-basketball, i-volleyball, le-swimming. Kubikwa njalo ukuba kuzakuba lezindlu zokutshintshela, indawo yokuhlala kanye lendawo yokupaka izimota. Kuzakwakhiwa amahofisi, lendawo yokudlela.
“Kuyangijabulisa ukuthi ekucineni sifinyelele ehlelweni lwethu. Kubongwa idolobho lakoBulawayo ngosekelo kanye lenkuthazo esisifikise kulesisigaba,” kutsho uNakamba.
“Bekuhlezi kuliphupho lami ukuthi kube lesakhiwo esisezingeni eliphezulu esizathokozelwa yintsha yethu, okuyinto thina esingakhulanga silayo.”
