uMthunywa
KUSOLWA umbango wokuthengiswa kwezidakamizwa njengembangela yokudutshulwa kubulawe abesilisa abangu-5 edolobheni leRichards Bay ngoLwesibili ekuseni. Ngokutsho kwabaziboneleyo, kufike ababulali abebehamba ngeVW Polo eluhlaza, bavulela ngezulu lezandla bebhekise kubafi. Abane batshonele endaweni yesehlakalo, oyedwa watshonela emtholampilo wendawo. Ngokutsho komthombo okulindawo, kulombango wokuthengiswa kwezidakamizwa. Okhulumela amapholisa eKwaZulu-Natal, uLieutenant Colonel Robert Netshiunda, uthe kayaziwa imbangela yesehlakalo lesi, kodwa sihlobene lokuthengiswa kwezidakamizwa.
“Amapholisa asezithendeni zababulali emuva kokuba kudutshulwe abantu abangu-5. Abasolwa baqede ukugila lumkhuba, babaleka ngemota abafike ngayo. Amapholisa anxusa noma ngubani ongaba lolwazi ukuba axhumane lawo,” kutsho uNetshiunda.
Umfanekiso uthethwe ku Shutterstock
Abaholi bezinhlaka ezehlukeneyo, okubalwa loManisipala weMhlathuze, bayile endaweni yesehlakalo. UMeya weMhlathuze, uMnu Xolani Ngwezi, uthe okubi yikuthi lesi sehlakalo senzakale ngemva kwemizamo eminengi yamapholisa yokulwa lokudutshulwa kwabantu ezindaweni ezehlukeneyo kulomanisipala. “Sikhathazekile ngalesi sehlakalo, ngoba siveza kabi indawo ledolobha lethu. Sinxusa noma ngabe ngubani ongaba lolwazi ukuba axhumane lamapholisa ukuze kubotshwe abenzi bobubi,” kutsho uMnu Ngwezi.
