uMthunywa
YiNtatheli kaMthunywa
KUSINA kudedelwana enkundleni yebhola likanobhutshuzwayo kunkezo yezikolo eyeCOPA Coca-Cola kuzo zonke izabelo kulimpelaviki.
Kusukela ngoLwesihlanu kuze kuyefika ngoMggqibelo zonke izabelo zelizwe zizaphatha imidlalo yokudinga lezo zikolo ezizakuya kumidlalo yokucina.
Ngemva kwemidlalo le, kuzabuthanwa esabelweni seMashonaland West mhlaka 11-13 Ntulikazi edolobheni leKadoma.
Loba nje ezinye izabelo ziqala ukuncintisana ngoLwesihlanu, isabelo seMat North sizaqala ngoLwesihlanu kusigaba sebhola lamantombazana.
KoBulawayo, kumdlalo wabafana kuzakuba lesikolo seMpopoma, St Bernard’s, Pumula, Msiteli, Gifford, Luveve, Mzilikazi Milton leSikhulile.
Amantombazana adinga ukuya eKadoma aphuma kuzikolo ezibalisa iMpopoma, Sobukazi, Luveve, Mncumbatha, Maranatha,Townsend, Founders, Magwegwe leNkulumane.
Inkezo yeCOPA Coca-Cola yaqala ukudlalwa eZimbabwe ngo1989. Ngalowo mnyaka, iMzilikazi High yabayintshantshu yazo zonke izikolo idlalelwa nguPeter Ndlovu.
Ukuphumelela kwalinkezo ekuthuthukiseni ithalenta lenguqu ezikolo kuncomwe yiziphathamandla zemidlalo kuhulumende ezibike ukuba lamanye amankampani kumele enze okufanayo.
Esabelweni sakoBulawayo kubusa isikolo seMzilikazi High esathwala linkezo kane.
Isikolo lesi sesathwala iCopa Coca Cola kane, ngo1989, 1993, 1999 lango-2001.
Mhla ibizwa njengentshantshu ngo1989, koBulawayo, iMzilikazi High yaphiwa inkezo ngumuyi uJoshua Mqabuko Nyongolo Nkomo owayengumsekeli kamongameli welizwe.
Isiphathamandla seCoca-Cola uVee Chibanda ukhuthaze abafundi ukuthi loba bezaqinela ukudlala inguqu, bengalibali ukubala ingwalo.
“Ngithanda ukukhuthaza abadlali ukuba izifundo lazo ziqakathekile. Ungabe ungumdlali wenguqu kodwa yazi ukuba ingwalo zingakuhambisa indawo ezinengi, zikuvulele lamathuba wokuphila impilo oyifunayo,” kutsho uChibanda.
