Kusazobaluthuli kumaWarriors

Lovemore Dube
AKASOZE akuthole ukuphumula umqeqetshi wamaWarriors uMichael Nees loba esanda kunqoba iNamibia 1-0 nanko ngoLwesine kuviki ezayo ukhangelelwe ukuthi kubonakale ubugcitshi bakhe bokuqeqetsha kumdlalo ozakuba seOrlando Stadium, eJohannesburg, South Africa kumidlalo yeAfcon Group J.

Lokhu kwenze wasondela eduzane lokunqoba, aye eMorocco kumnyaka ozayo lapho okuzadlalelwa khona inkezo yeAfrica.

Kuviki ezayo uNees uzangqikilana leqembu leSwatini kunkezo yeChan 2025 Qualifier.

Kulinkezo uzabe elabadlali abadlala beseZimbabwe abatshisayo kuCastle Lager Premiership.

Kunkezo yeAfcon usebenzise iqula elilabanye abadlali abadlala kwamanye amazwe.

Ngemva kokunqoba usele exotshana leCameroon elemiklomelo engu-10 kukanti amaWarriors alemiklomelo engu-8.

KuGroup J, iZimbabwe ileCameroon, Kenya leNamibia.

Ngokunqotshwa yiZimbabwe kumahlandla womabili, iNamibia ayisekho kumncintiswano wokungena kunkezo le ngoba inqotshwe ngamaqembu onke.

IKenya engeyesithathu kumidlalo le kungenzeka iphazamise iZimbabwe kumidlalo emibili le eseleyo.

Ilemiklomelo emine ngakho nxa inganqoba iZimbabwe leNamibia kunyanga ezayo iZimbabwe inqotshwe kumidlalo eseleyo leKenya leCameroon.

IKenya ilakho ukuqeda ilemiklomelo engu-10, kuthi iZimbabwe nxa ithe yadliwa yonke imidlalo ingaba iyabe ilengu-8.

Mhlaka 11 Lwezi, iZimbabwe izadlala leKenya, akukacaci ukuthi ngaphi, kuthi mhlaka 19 Lwezi baqedelane leCameroon khonale entshonalanga ye-Africa.

UNees uthe kasoze athatheke ngokudla iNamibia.

U-Michael Nees

“Ngabe sesiphumile kumncintiswano ngabe sinqotshwe yiNamibia. Kodwa ngenxa yokudlala kuhle lokhe kusezandleni zethu ukuyaphambili. Siyajabula ukuthi siseselethuba lokulwela imiklomelo eyisithupha,” kutsho uNees ngoMvulo ngemva komdlalo leNamibia.

IZimbabwe ike yadlala leNamibia ngoLwesihlanu kungelabantu enkundleni. INamibia layo kayilazo inkundla ezikusimo esidingwa yiFifa, leConfederation of African Football. INamibia yathi kayenelisi ukubhadala amapholisa labonogada ababezabe besenkundleni.

“Kubekuhle ukudlala phambili kwabasekeli bethu. Angazi ukuthi bebebangaki kodwa umsindo wedlule labo akade bekhona. Bekungasumdlalo olula lesitha lesi.”

Umqeqetshi lo uthe iNamibia layo ibibophe zaqina ikakhulu kulabo abahlohlayo uPeter Shalule weMamelodi Sundowns.

Iqembu lamaWarriors

Uthe isifiso sakhe yikuba kundawo zonke kube labadlali abathathu abangabizwa. Uthi iqembu lesizwe kumele lihlale lilabadlali abangamatshumi amabili kusiya kumatshumi amathathu ukuze basebenze nzima besenzela ukukhethwa.

IZimbabwe izadlala le-Eswatini ku25-27 wenyanga yona le, ibuye njalo idibane layo kuviki elilandelayo mhlaka 1 kusiya ku 3 Lwezi.

Abanqobayo bazahlangana leMadagascar, ingqwele ibisisiya kumdlalo wenkezo yeChan ngoNhlolanja ngomnyaka ka2025 lapho eKenya, Uganda leTanzania.