uMthunywa
Nkosilathi Sibanda
LOBA engafuni ukuphenduka ekhaya, abalandeli bakhe lokhe besamfuna njalo bayamkhumbula uLovemore Majaivana.
Kubikwa kuzakuba ngumcimbi ongafuni umfana omncinyane lapho okuzaqhunswa zonke ingoma zikaMajaivana enkundleni yeMguza Yatch Club ekupheleni kukaNkwenkwezi.
Lo ngumcimbi wakuqala waloluhlobo koBulawayo lokhe uMajaivana wafulathela lelidolobho eluqondise eHarare, andubana ayeMelika.
Kodwa, ngemva kweminyaka yonke le, inkundla yeMguza Yatch Club ikubone kufanele ukuthi kube lomkhosi wokukhumbula umculi wodumo lo lengcitshi yembongi uAlbert Nyathi.
Ngokutsho kwabaqondisi bohlelo, umcimbi lo uzabizwa ngokuthi yi “Paying Tribute to Albert Nyathi and Lovemore Majaivana” oyisikhumbuzo salaba bobabili abayinsika yokumemetheka kwengoma lenkondlo zolimi lwesiNdebele.
Umfanekiso lo uthethwe kuShutterstock
Umaneja weMguza Yacht Club uTawanda Muchechete, ekhuluma lentatheli ngoLwesibili emini uthe konke lokhu bakwenze behlose ukuthi bafundise abantu ukuthi kumele babonge njalo bananze osaziwayo kwezomculo besaphila.
“Sifuna ukubabonga besaphila ngoba sesananzelela ukuba kulomkhuba wokubonga abantu sebedlule emhlabeni. NjengeMguza Yatch Club, sizabe sithakazelela uMajaivana loAlbert Nyathi ngokwenza umcimbi lo,” kutsho uMuchechete.
Uthe uMajaivana ubanikeze imvumo yokuthi baqhubeke ngomcimbi.
UNyathi loMajaivana babalelwa phezulu ebantwini abakhankasela ukulondolozwa kolimi, usiko lokukholisisa uzulu.
Mhla welanga, kubikwa ingoma zikaMajaivana zizahlatshelwa nguRamsey K, umculi wakoBulawayo owanqoba isicoco koBulawayo Arts Awards ngomnyaka odluleyo. Abanye abaculi abakhethiweyo nguBig Band, DJ Teekay loDJ Austin.
Bulawayo Arts Awards
Intatheli yephephandaba likazulu ixhumane loNyathi othe umcimbi uze ngesikhathi esifaneleyo.
“Simenywe yiMguza Yacht Club, yibo abathe kumele kubelomcimbi lo okhumbula mina loLovemore ‘Magee’ Majaivana,” kutsho uNyathi.
“Ngizizwa ngihlonitshwe kakhulu ngokucelwa ukuthi ngibe kumcimbi lo. Ngiyazehlisa njalo ngiyabonga ukuthi imisebenzi yami iyahlonitshwa.
