IKHANSILI yakoBulawayo isibike ukuba kungaba lengozi yokuqhamuka komkhuhlane wesihudo elokitshini leTshabalala Extension.
Kumbiko othunyelwe ngumabhalane wekhansili uChristopher Dube ngoLwesithathu emini, kubikwa ikhansili yathola umlayezo wokuthi kulesakhamuzi sakulindawo esiphethwe yisihudo mhlaka 28 Lwezi, okuyikho okulimukise ikhansili.
“Kulandela ukuthola lumbiko, iqula lekhansili yakoBulawayo lenze uphenyo mhlaka 29 Lwezi. Kuqalwe ngokuhlolwa ekilinika yeTshabalala kwatholakala ukuba banengi abantu abalesihudo.
“Iqula lekhansili le liphinde lavakatshela izimuli kuleli lokitshi lacebisa labo abahlaselwe yisihudo ukuba bayeekilinika yeTshabalala. Kuxoxiswane lenkokheli zakulindawo ukuthi zikhuthaze izakhamizi ziyethola uncedo lokuhlolwa lokwelatshwa isihudo mahala,” kutsho umbiko wekhansili.