uMthunywa
YiNtatheli kaMthunywa
SOKUFE inkomo ezedlula i-130 esabelweni seMidlands kulandela ukuqhamuka komkhuhlane weTheileriosis owaziwa kakhulu ngokuthi yiJanuary disease.
Kubikwa isigaba esihlaselwe kakhulu ngumkhuhlane lo ngeseShurugwi.
Abalimi esabelweni lesi babhekane lobunzima bokulwisa umkhuhlane lo okwesikhathi eside esigabeni lesi.
UHulumende uthe umkhuhlane lo obangelwa yimikhaza ngeviki yokuqala kaZibandlela akulula ukuwulwisa kungakho abalimi bakhuthazwa ukuthi balandele indlela eziqondileyo zokuwuvimba.
UMidlands Provincial Veterinary Officer uDokotela Martin Sibanda uthe: “uhlupho ngeJanuary disease yikuthi sokungani ngumkhuhlane ovuka minyaka yonke. Kulesisabelo iShurugwi yiyo ehlaselwe kakhulu njalo sesizwe ngezinye indawo esezihlaselwe ezibalisa iMvuma, Lalaphansi, Zvishavane kunye leMberengwa esiqintini seNeta. Sikhuthaza abalimi ukuthi badibhise inkomo zabo ukuze kuvinjwe ukumemetheka komkhuhlane lo.”
UHulumende usehambise imithi edingakalayo ukuze kuyolwisa isifo lesi endaweni ezihluphayo.
“Thina sesihambisile imithi ezasetshenziswa kuminyaka emibili ezayo. Kusenjalo sikhuthaza abalimi ukuthi bafake imali kumithi yokulwisa umkhuhlane lo sonke isikhathi.
Ukulima yibhizimusi, ngokunjalo kumele sibe lendlela zokuvikela inotho yethu.”
Nyakenye isabelo seMidlands salahlekelwa zinkomo ezedlula i-700 ngenxa yomkhuhlane ofanayo okuyikho osekwenze uHulumende kunye labanye asebenzisana labo bafaka imali kuloluhlangothi ukuze kwehliswe ukulahlekelwa.
