uMthunywa
KUPHOSE kwaphuma isidumbu kowesifazane ohlale inyanga yonke lamasoka akhe amabili endlini eyodwa belala embhedeni munye.
Owesifazane lo uNkosazana Khululani Boyce (29) we-Adams, kodwa ongowokudabuka e-Eastern Cape, intatheli ifike qathatha ukuyozibonela le nsumansumane yakhe langempela yafika ezihlalele kamnandi lamasoka akhe uMnumzana Masibulele Vikilahle (35) loMnumzana Akhona Mbanyana ambiza ngesoka laseGoli.
Echaza uthi isoka uMnumzana Vikilahle sekuleminyaka elala lalo endlini kanti uMnu Mbanyana uhlangane laye ngoMpandula nyakenye eseGoli. Uthi uhlale isikhathi esincane eGoli izinto zakhe zingahlangani, wanquma ukubuya ngoMabasa walonyaka.
Ubuyele e-Adams lapho ebevele ehlala khona loMnu Vikilahle ngoba bebesathandana. Uthi ngitsho langesikhathi eseGoli bebefonelana zonke insuku. Uthi ubekhohlisa uMnu Mbanyana ngokuthi ukhuluma lomfowabo.
UMnu Mbanyane utshele intatheli ukuthi okumenze waze wavakatsha yikuthi ubetshiswa luthando, kwathi uma emthinta uNkzn Boyce ecela ukuba babonane kazange abe lenkinga, wathi makeze yize ehlala lomfowabo
“Ebusuku wavuka wathatha ingqamu ethi uyasibhokoda”
ingqamu
“Ngithe uma ngifika mhlaka-8 kuMabasa, bangamukela kahle kwangabi lenkinga. Inkinga yaqala sekufanele kulalwe, owesifazane eziphosa embhedeni, lomfowabo ngambona emlandela. Ngahlala nje isikhathi kwaze kwaba lo engithandana laye uyangibiza uthi mangizolala, indoda yabhoka ngolaka ibuza ukuthi kanti ngingubani mina esengingaze ngilale labo embhedeni ngabe ngendlalelwa phansi.
“Lo owesifazane yilapho eveze khona ukuthi usithanda sobabili ngakho masiphilisaneni. Yize ube khona umsindo kodwa cine engivumelile ngangena embhedeni. Kwaba lengxabano ebusuku sekuvuka imizwa sizitshela ukuthi ujumekile kanti cha, wasibona wavuka wathatha ingqamu ethi uyasibhokoda.
“Saxolisa-ke yagcina idlulile indaba. Ngakusasa ngangifisa ukuvuka ngigibele ngibuyele ekhaya kodwa ingekho indlela njengoba bengingelayo imali yokubuyela eGoli,” kutsho uMnu Mbanyana.
Ucine esesebenza ukuxovela imbangi yakhe udaka.
Uthi kuhambe izinsukwana uMnu Vikilahle wacina emamukele, bahlalisana. Uthi bekuthi uma eyokwenza umsebenzi wakhe wokwakha asale lesithandwa sakhe benze konke abafisa ukukwenza emini.
Uma esebuya emsebenzini kube yisikhathi sakhe yena abukele. Uthi ucine uMnu Vikilahle esethi abahambe laye uma beyosebenza ngoba ngeke ondle indoda elala lomfazi wakhe.
“Besihamba ngimxovele udaka yena akhe, size sibuye ntambana. U-R1200 esawuthola emsebenzini sathenga ngawo ukudla. Saqhubeka sahlala sengimthatha njengomfowethu ngokunjalo laye yize benginakho lokhu kokuthi angangenzakalisa kodwa bengingenayo into engingayeza.
Kusize ukungenelela komsakazi weZwi Lomzansi
“Limpilo kuhambe kwahamba yangikhathaza, ngafonele emsakazweni Izwi Lomzansi ngacela ukusizwa ngemali yokuphindela emuva.
Nangempela uMnu Victor Xaba owenza uhlelo iThemba Lokuphila, wangithengela ithikithi lebhasi lokubuyela eGoli ngoMsombuluko (esiphuma kuwona),” kutsho uMnu Mbanyana.
Uthi akaziboni esehlukana lalo owesifazane ngoba umthanda ukufa. Uthi njengoba esebuyele eGoli nje, isifiso sakhe yikuthola umsebenzi lendlu engeyakhe njengoba ehlala labafowabo, ukuze ezolanda uNkzn Boyce.
UMnu Xaba laye obekhona ngesikhathi intatheli yeILANGA lihambele kulumuzi, uthi into emthintileyo yikuphila kwalo owesilisa ongumnikazi womuzi, uMnu Vikilahle ngoba ubengambulala uMnu Mbanyana, abulale lowesifazane kodwa bahlalisana okuyinto amadoda amanengi engehluleka ukuyenza.
“Ngibasiziswe yikuthi kungaze konakele yize uMnu Vikilahle ubesemamukele uMnu Mbanyana kodwa kulula ukuthi baxabane balimazane njengoba bebesesithenjini nje,” kutsho uMnu Xaba. – Ilanga.
