YiNtatheli kaMthunywa
ABAGIJIMI bakuleli bazabuyela enkundleni ngoMgqibelo lapho inhlanganiso yeBulawayo Athletics Board (Bab) ezaqhuba khona umncintiswano walo wokugijima enkundleni yeWhite City Stadium.
Lo kuzabe kungumncintiswano wesibili owezinga laphezulu osuqhutshwe lonyaka. Labo abafuna ukugijima bacetshiswe ukuthi babhalise emahofisini eBab aseWhite City Stadium.
Umgcinisihlalo weBab uWatson Madanyika uthe: “Sekuvuliwe ukubhalisa kulumncintiswano wokugijima. Savula kuselesikhathi ukuze abagijimi bathole isikhathi esaneleyo njalo silethemba lokuthi kuzancintisa abanengi.
“Sikhuthaza bonke abaphatheka kwezemidlalo ukuthi basukumele phezulu baphatheke kulumncintiswano.”
Imincintiswano izaqala ngehola lesitshiya galombili ekuseni, ngokubika kukaMadanyika.
Kuzancintiswanwa emidlwalweni ebalisela i-100m, 100mh, 110mh, 200m, 400m, 400mh, 800m, 1 500m, 3 000m, 5 000m, 4x100m relay, 4x400m relay, long jump, triple jump, high jump, javelin, shot put, le discus.
