Wayne Ncube
ABADLALI abasakhulayo kumdlalo wethenisi sebekhuthazwe ukuba baphakamise isisindo sobungcitshi babo ukuze benelise ukudlala kumincintiswano yaphezulu.
Inkuthazo le ivela kuWitness Jiyane uMgcinisihlalo weqembu elenza kuhle ekulolongeni abasakhulayo eleMakhandeni Tennis Club.
UJiyane ubike ukuba abadlali kumele balangazelele ukudlala labanqobi bomhlaba enkundleni zaphezulu. Ukhulume lokhu ngemva kokuqoqa umncintiswano weMakhandeni Open oqhutshelwe esikolo seGirls College koBulawayo.
Kumncintiswano lo bekulabadlali abafika i180 njalo bevela endaweni ezehlukeneyo. UJiyane uthe iMakhandeni Open isithole udumo njalo bakhona abadlali abavela phetsheya asebebike ukuba balesifiso sokuncintisa kuwo.
“Imidlalo yethu iqhube kakuhle. Sithole abadlali abaphuma kundawo ezitshiyeneyo zelizwe ezibalisa iFolosi, iGweru, iKwekwe, Harare leGwanda. Ngokuya kwesikhathi, iMakhandeni Open le izabalwa njengemncintiswano yaphezulu kukhalenda yenhlanganiso yeTennis Zimbabwe.
Uthe abadlali abasakhulayo balomlandu wokulolonga ebusuku lemini belenhloso yokudlala njengentshantshu, bathole ubungcitshi obungaphezulu.
“Kumdlalo wethenisi njengayo yonke imidlalo kumele umuntu aphakamise ubungcitshi bakhe. Ubungcitshi buyalolwa njengengqamu. Kumele nxa udlala ubebukhali. Ababukeli kumele bakubone ukuthi ubungcitshi bomdlali lo sebuphezulu.
“Abasakhulayo yibo abalesikhathi esihle sokuthi balolonge indlela abatshaya ngayo ibhola, baqinise imizimba yabo.”
Umqeqetshi lo uthe ukhuthaza njalo abadlali abasakhulayo izwe lonke ukuthi basebenzise inkundla zemidlalo kulokuhlalela izandla.
Uthe abatsha abalethalenta lemidlalo balomlandu wokuthi basebenzise inkundla baphakamise impilo zabo.
“Ngiyakhumbula thina sasigcwala inkundla zazinyakazela ngabasakhulayo, sikholisa ukudlala. Ukubuthana kwethu kwenza abanye bazibonakalisa ngamathalenta abo.
“Okungehlula abantwabethu ukuthi benze lokhu kuyini? Yikho ngisithi abasakhulayo kumdlalo wethenisi abasukume benze okungcono ngempilo zabo bengabadlali,” nguJiyane lo.
Isixwayiso sikaJiyane sibalulekile njalo siphuma kumqeqetshi oyingcitshi ngokwakhe.
UJiyane ubonge abazali babantwana abadlala ithenisi wathi usekelo lwabo lwenza inhlelo zeMakhandeni Tennis ziqhutshwe kuhle.