uMthunywa
YiNtatheli kaMthunywa
UMQEQETSHI omutsha weHighlanders uMandla “Lulu” Mpofu uzabonakala esukuma, ejika izandla ekhwaza okwakuqala enkundleni yeBarbourfields.
Ababukeli bemidlalo yeHighlanders basebejwayele ukubona lumqeqetshi ehlezi phose umdlalo uze uphele. Ngaleso isikhathi bekukhuza uMadinda Ndlovu, okwakhathesi nguye.
Sekuphelile ukunamathela isitulo ngoba akusahlaleki phansi kusikhundla esitsha.
NgeSonto uLulu labadlali bakhe banxuse iFC Platinum ukuze kuvele ukuthi yiphi enkulu kulenye kumaqembu la asetshikilisane adelelana.
Zombili zidibana kumdlalo wetshumi lane weligi yeCastle Lager.
IBosso ingena kulumdlalo ilabadlali abambalwa abalimeleyo kukanti njalo yamukela umgadli wayo uPrince Dube. Umdlali lo ubejezisiwe kumdlalo odluleyo awubukele ephandle ngoba wathola amakhasi alithanga amathathu.
Kulumdlalo, kukhangelelwe ukuthi kuzagcwala kuthi phamu eBarbourfields abathandi benguqu belande ukuzobona ukuthi yibaphi abadlali abatsha abakhona kulamaqembu.
Ngokuhlolisisa kwephephandaba likazulu, amaqembu la asathule ngokudinga abadlali abatsha.
Umqeqetshi weBosso ubekubikile ukuba uzafisa ukuqinisa iqembu lakhe ngabagadli njengoba lithwele nzima ukuhlohla.
Ebuzwa ukuthi yibaphi abadlali abafunayo, uMpofu kazange athande ukutsho. IHighlanders ithembele kuDube ukuthi ahlohle kodwa lumdlali ulebhola elilodwa zwi.
Ithemba selikubadlali abavutha ulaka ngenguqu uRyan “Ndori Ndori” Lunga loCleopas “Matatazela” Kapupurika.
Izimbamgodi zikhanya ziqinile njengoba umqeqetshi wazo uNorman Mapeza esitsho.
Inkuthazo kuBosso yikuthi ngalelolanga ivule amehlo ngoba iqula leFC Platinum alisoze livume ukwehliswa lona liyilungiselele ngamandla isizini ka2019.
NgoMgqibelo: Black Rhinos v Dynamos (National Sports), Harare City v ZPC Kariba (Rufaro Stadium), Chapungu v Ngezi Platinum (Mandava Stadium), Bulawayo Chiefs v Manica Diamonds (Luveve Stadium).
NgeSonto: Highlanders v FC Platinum (Barbourfields Stadium), Caps United v Yadah (NSS), Hwange v Chicken Inn (Colliery Stadium), Triangle United v Telone (Gibbo Stadium), Mushowani Stars v Herentals (Trojan Stadium).
