uMthunywa
Nkosilathi Sibanda
UKUQALA komdlalo wenguqu kuleli kuzakuba nzima nanko amaqembu aveza ukuthi angeke enelise ukuthola imali yokuhlola abadlali isimo segcikwane leCovid-19.
Lokhu kuza ngesikhathi inhlanganiso yeSports and Recreation Commission (SRC) ibike ukuba sekuvunyelwa ukuthi amaqembu aqale ukulolonga elungiselela imidlalo.
“I-Sports and Recreation Commission yazisa ukuba ukudlalwa kwenguqu sekuvunyelwa…,” kutsho linhlanganiso kuncwadi eyithumele iZifa.
ISRC, kuncwadi ekhitshwe kumalanga adluleyo, ibike ukuba ivumele inguqu yePremier Soccer League, amaWarriors lebhola lamantombazana kuphela.
Inhlanganiso le, ithe inguqu izadlalwa kulandelwa uhlelo lwe-bio bubble.
I-Bio bubble le luhlelo oluvumela ukuthi abadlali bengahlangani labanye abantu ngesikhathi bencintisa. Ukuhlohlwa igcikwane njalonje kuyisiqokoqela.
Kodwa iziphathamandla ezimbalwa ezikhulume lephephandaba likazulu zibike ukuba nxa kumele zizibhadalele indleko zokuhlola igcikwane, kuza kubangumthwalo.
Ukuhlola iCovid-19 ngohlobo lwe- Polymerase Chain Reaction (PCR) kubiza iUS$60.
Le yimali amathimu abika ukuba awalayo.
“Kunzima, kunzima sibili. Iqembu lethu alilami njalo siyazi ukuthi ayisithi sodwa esingelayo,” kutsho esinye isiphathamandla seqembu lakoBulawayo.
Isikhalazo lesi siza kulandela ukubanjwa kwabadlali abathathu beqembu leBulawayo City belegcikwane leli kuliviki.
IBulawayo City ihlole abadlali abalitshumi lanhlanu iqula labaqeqetshi lenkokheli zalo.
Banengi abadlali benguqu asebetholakale belegcikwane leCovid-19 kulandela ukuqala kwemidlalo kumaligi aphezulu e-Africa laphetsheya.
Kusenjalo, inhlanganiso ebambe umdlalo webhola kuleli iZifa ayikaphumeli egcekeni ngokuthi izaqhuba njani imidlalo kulandela isimemezelo zeSRC.
