uMthunywa
UGATSHA lwezemfundo soluveze ukuthi kungenzeka ukuthi kubhalwe imihloliso ngokuphumelela kubafundi bemfundo ye-primary kanye leye-secondary.
Unobhala omkhulu kwezemfundo yaphansi leyaphezulu uNkosikazi Tumisang Thabela ubike lokhu ngesikhathi ephendula imibuzo yentatheli ngemva kwesaziso seKhabhinethi ngoLwesibili.
Sesikhulume lequla labaphathi bethu sakunanzelela ukuba kungenzeka sibili ukuthi kulotshwe imihloliso lonyaka.
“Eminye imihloliso isingalotshwa ekuqaleni komnyaka ozayo njengalokhu okwenzakala nyakenye. Silethemba lokuthi abafundi bethu bazakwenelisa njalo bazakube sebelungele ukubhala.
“Abafundi bakuleli balentshukuntshu yokufunda njalo ababalisi bakhona bazimisele ukulungiselela ikusasa labantwana.
“Njengogatsha sikholwa ukuthi kungumlandu wethu ukuthi abafundi babelekusasa elihle kanye lokuthi sibalungiselele ngokwaneleyo ukuze baphumelele kumihloliso yabo,” utsho njalo.
UNkkz Thabela uthe ugatsha lunanzelele ukuthi ababalisi bayahamba emsebenzini.
“Ababalisi bayahamba emsebenzini njalo sifumane ukuba isilinganiso esingange-70 phesenti sisemsebenzini.”
Kudaba lezimota zokuhambisa uNkkz Thabela uthe uHulumende uphakathi kokulungisa izinhlelo ezitshiyeneyo zokuthi abantu kanye labafundi bathole izimota, izitimela lamabhasi okuhamba lula.
Uphinde wakhuthaza abafundi abazithwala ngesikhathi se-lockdown ukuthi babuyele esikolo nanko phela imfundo ililungelo labo.
Kungxoxo ngemva kokuvakatshela isikolo seWestlea Primary School ehamba lequla leUnicef ukuze babone ukuthi isikolo lesi silandela imilayo yenhlanganiso yeWorld Helath Organisation eyokuvikela ukumemetheka kobhubhane, uNkkz Thabela uthe kuqakathekile ukuthi izikolo zilandele imilayo yeWHO kanye logatsha lwezempilakahle.
“Siyathokoza ukuba abantwana sebebuyele esikolo, sihamba kuzigaba sikhuthaza abantwana ukuba babuyele ezikolo.
“Besisebenzelana labenhlanganiso ezitshiyeneyo ukuze sibone ukuthi izikolo sezilungele ukuvulwa. Silethemba lokuthi ababalisi labaphathi bazaphathisa ukugcina abafundi bephephile njalo babone ukuthi balungele imihloliso yabo.
Ukuze kwenqatshelwe ukumemetheka kweCovid-19 uHulumende usethe abantwana abaleminyaka engu-14 kusiya ku-17 labo sebengahlatshwa ijekiseni yokuvikela iCovid-19.
